Ադրբեջանցի հաքերների համար հունվարի 20-ը սեզոնային ակտիվացման օր է. դա այն օրն է, երբ ջարդերից հետո խորհրդային բանակը մտավ Ադրբեջան, և որն ադրբեջանցիներն անվանում են Սև հունվար: Այսօր տեղի ունեցած մամուլի ասուլիսի ժամանակ այս մասին ասաց տեղեկատվական անվտանգության փորձագետ Սամվել Մարտիրոսյանը՝ հավելելով, որ մոտակա շաբաթներին հաքերները լուռ կլինեն՝ ակտիվանալու փետրվարի 26-28-ին՝ Խոջալուի դեպքերի օրերին:
«Ադրբեջանցի հաքերների կողմից պարբերաբար թիրախ են դառնում հատկապես ԼՂՀ կայքերը: Որքան հայաստանյան կայքերը պաշտպանված են, այդքան խոցելի են արցախյան կայքերը, որոնցից որոշներն ադրբեջանցի հաքերների կողմից հարձակման ենթարկվելուց հետո դեռ չեն վերականգնվել»,- ասաց նա:
Սամվել Մարտիրոսյանի խոսքով՝ անցած տարի ադրբեջանցի հաքերներն առավել ակտիվ են եղել՝ գործելով շուրջ հազար հարձակում: «Կոտրված կայքերի քանակն աստիճանաբար նվազում է: Անցած տարվա 300 կոտրած կայքի դիմաց այս տարի կոտրվել է մոտ 70 հայկական կայք:
Ինչ վերաբերում է թուրք հաքերներին, ապա հայկական կայքերի վրա նրանք ավելի ու ավելի քիչ են հարձակումներ գործում. պատճառը սիրիական խնդիրն է, և թուրք հաքերների ուշադրությունը հիմնականում սևեռված է սիրիական կայքերի վրա»,- ասաց նա:
ՏՏ անվտանգության փորձագետը նշեց, որ քիչ չեն կայքերը ջարդելու միջոցով ինֆորմացիայի տիրանալու դեպքերը: «Այսօրինակ դեպքերի մասին, սակայն, հանրությունը չի իմանում: Բարբախտաբար, ադրբեջանցի հաքերները, մի անգամ ջարդելով հայ որոշ լրագրողների էլեկտրոնային փոստերը, ուղղակի հրապարակային, բաց դրել էին ինտերնետում, փոխանակ, ասենք, նրանցից մեկնումեկի անունից նամակ ուղարկեին ասենք, Հովիկ Աբրահամյանին»,- ասաց նա:
Ասուլիսի մյուս բանախոս, «Ինտերնետ հանրություն» ՀԿ փոխնախագահ Գրիգոր Սաղյանն էլ կարևորեց, որ Հայաստանում սկսել է գործել մի խումբ, որը կայքերի անվտանգության ապահովման դասընթացներ է տալիս բոլոր շահագրգիռ կողմերին: «Պաշտպանված կայք ունենալու համար անհրաժեշտ է մեծ գումարներ ծախսել: Փոքր գումարով, բնականաբար, ստանում ես փոքր պաշտպանություն: Ինչ վերաբերում է կայքերի վրա դը դոս հարձակումներին, ապա հայկական կայքերի սերվերներն ավելի ու ավելի հաճախ տեղակայվում են արտասահմանում:
