«Վճռաբեկ դատարանի նախագահի հրաժարականն անխուսափելի էր։ Պահանջ կար և՛ ներքևից, և՛ վերևից։ Նա մեծ հաշվով ձախողվեց, որի մեղքը գալիս էր վերևից՝ կոռումպացված, բրգաձև համակարգից»,- «Առաջին լրատվական»-ի հետ զրույցում ասաց «Անկախ դատավոր» ՀԿ նախագահ Պարգև Օհանյանը` անդրադառնալով Արման Մկրտումյանի հրաժարականին։
Պարգև Օհանյանի խոսքով՝ Մկրտումյանի հրաժարականից հետո հանրապետության նախագահը պետք է վճռաբեկ դատարանում նշանակի այն Նիկոլին, որը պետք է կարողանա հեղափոխություն անել նաև դատական համակարգում։ «Չնայած ես այն կարծիքին չեմ, որ անձերից շատ բան է կախված։ Խնդիրը համակարգային է, և այս կոնտեքստում պետք է առնվազն ապուշ լինես, որ նոր իրողությունների պարագայում չփորձես փոխվել։ Դատավորները պետք է փոխվեն, հասկանան, որ գնացքը գնացել է»,- ասաց Օհանյանը։
Նրա խոսքով՝ տարիներ շարունակ հրահանգով աշխատած դատավորները մեծ ցանկության դեպքում կարող են փոխվել անհրաժեշտ նախադրյալների պարագայում։ Իսկ այդ անհրաժեշտ նախադրյալները կան, դրա մասին հայտարարեց վարչապետ Նիկոլ Փաշինյանը, որ որևէ կերպ չեն միջամտելու դատական համակարգի գործունեությանը։
Մեր դիտարկմանը, թե դատական համակարգում լիարժեք հեղափոխություն հնարավո՞ր է, քանի որ Բարձրագույն դատական խորհուրդը ղեկավարում է Գագիկ Հարությունյանը, ով նախկին իշխանությունների «մարդն» է համարվում, Օհանյանը պատասխանեց. «ԲԴԽ-ից շատ բան է կախված։
Այո, անդամներից շատերը գուցե նախկինում կախվածություն են ունեցել, բայց հիմա կարող է հեղափոխությունը ազդել նաև նրանց վրա, իրենք կարող են գիտակցել, որ իրենցից շատ բան է կախված, և իրենք պետք է արդարացնեն ժողովրդի վստահությունը։ Գագիկ Հարությունյանը պրոֆեսիոնալ է, և կարծում եմ՝ առաջիկայում դրական փոփոխություններ կլինեն»։
Առավել մանրամասն՝ տեսանյութում:
