«Արևելյան գործընկերության» երկրները, այդ թվում՝ Ուկրաինան, համապատասխան պայմանների և բարեփոխումների կատարման դիմաց ԵՄ-ից հավելյալ ֆինանսական աջակցություն կստանան: Ինչպես հաղորդում է ITAR-TASS-ը, այս մասին ասվում է եվրոպական ծրագրի գագաթնաժողովի ամփոփ հայտարարության մեջ:
ԵՄ-ն նաև հասկացրել է, որ օգնության ծավալները կարող են մեծանալ այն բանից հետո, երբ այդ երկրները կստորագրեն ասոցացման մասին համաձայնագիրը:
Փաստաթղթում նշվում է, որ Ուկրաինայի և Վրաստանի համար մակրոֆինանսական օգնությունը կշարունակվի իրագործվել 2014-2015 թթ., եթե այս երկրները կատարեն բոլոր պայմանները և բարեփոխումները: Հայտարարության համաձայն՝ ԵՄ-ի կողմից նման օգնությունն ապագայում կարող է օգտագործվել վճարման հաշվեկշիռի կարճաժամկետ դեֆիցիտը փակելու համար:
Գագաթնաժողովի մասնակիցները ողջունել են նաև Եվրոպական վերակառուցման և զարգացման բանկի, Եվրոպական ներդրումային բանկի աջակցության ծրագրի իրագործումը: Դրանց գործունեությունն ապագայում կաջակցի բարեփոխումներին և ֆինանսավորումներին այնպիսի առաջնային ոլորտներում, ինչպիսիք են էներգետիկան, տրանսպորտային ենթակառուցվածքը, շրջակա միջավայրի պաշտպանությունը: Բացի այդ, այս երկու ֆինանսական ինստիտուտները կզբաղվեն նախագծերի իրագործմամբ, որոնց նպատակն է հեշտացնել վարկերի հասանելիությունը փոքր և միջին ձեռնարկությունների համար:
