Իրանի նկատմամբ պատժամիջոցների մեղմացման որոշումը, որը նախատեսված է Ժնևում իրանական միջուկային ծրագրի շուրջ Թեհրանի և «վեցյակի» միջև ձեռք բերված պայմանավորվածությամբ, գործնականում կիրականացվի առաջիկա շաբաթներին: Այս մասին հայտնում է Hill պարբերականը՝ հղում անելով ամերիկյան վարչակազմի աղբյուրին:
Կողմերի միջև ձեռք բերված պայմանավորվածությամբ՝ Իրանը պետք է նվազեցնի աշխատանքները միջուկային ծրագրի շրջանակում, միջազգային փորձագետներին հասանելիություն տրամադրի առավել մանրակրկիտ ստուգումների համար, որոնց դիմաց երկրի նկատմամբ գործող տնտեսական պատժամիջոցները կմեղմացվեն:
«Գործողությունների համատեղ պլանի իրագործման տեխնիկական մանրամասները պետք է վերջնականապես մշակվեն մինչ այն պահը, երբ համաձայնագրի պայմանները սկսեն գործել: Մենք աշխատում ենք հստակ գրաֆիկով, սպասում ենք, որ դա տեղի կունենա առաջիկա շաբաթներին: Տեղեկությունն այն մասին, որ Իրանի հանդեպ ֆինանսական պատժամիջոցներն արդեն մեղմացվել են, և նա հասանելիություն է ստացել միջոցներին, չի համապատասխանում իրականությանը»,- ասել է ԱՄՆ վարչակազմի ներկայացուցիչը:
Սպիտակ տունն ավելի վաղ ընդգծել էր, որ եթե Թեհրանը չկատարի պարտավորությունները, ապա պատժամիջոցները կվերականգնվեն նախկին ծավալով:
