Թաիլանդում ընդդիմությունը լայնածավալ հակակառավարական երթ է սկսել Բանգկոկի փողոցներում: Ցուցարարները մտադիր են արգելափակել կառավարական հիմնական հաստատությունների աշխատանքը և «խաղաղ կերպով տապալել կառավարությունը»՝ հաղորդում է ITAR-TASS-ը:
Ցուցարարները շարժվում են դեպի 13 տարբեր օբյեկտներ, որոնց թվում են կառավարական հիմնական գործակալությունները և գերատեսչությունները, այդ թվում՝ պաշտպանության նախարարությունը և հեռուստաալիքներ: Ցույցի կազմակերպիչները պնդում են, որ իրենց երթը խաղաղ բնույթ է կրում, սակայն կողմնակիցներին կոչ են անում ջրամատակարարումից զրկել կառավարական այն շենքերը, որոնք մտադիր են պաշարել:
Նախօրեին Բանգկոկի նահանգապետի գնահատմամբ՝ ավելի քան 400 հազար մարդ էր հավաքվել մայրաքաղաքի Ժողովրդավարության հուշահամալիրի մոտ և իրենց դժգոհությունն են արտահայտել կառավարությունից:
Երկրում բողոքի ալիքի պատճառը Սահմանադրական դատարանի վճիռն էր, որը չեղյալ է հայտարարել կառավարության և իշխող կուսակցության կողմից ընդունված Ազգային ժողովի ընտրական համակարգի բարեփոխման օրինագիծը:
«Եթե կառավարությունը և խորհրդարանը կայացնում են վճիռներ, որոնք դատարանն անօրինական է ճանաչում, ապա իրենք ևս գտնվում են օրենքի սահմաններից դուրս»,- վանկարկում են ցուցարարները:
