Եվրոպացի առաջնորդները փորձում են փրկել խոստումնալից համաձայնագիրը Ուկրաինայի հետ և նոր առաջարկներ են ներկայացնում նախագահ Վիկտոր Յանուկովիչին՝ գրում է The Wall Street Journal-ը:
Ինչպես պարբերականին փոխանցել են լավատեղյակ արևմտյան բարձրաստիճան պաշտոնյաները, նոյեմբերի 20-ին Ուկրաինայի նախագահը Եվրամիության ընդլայնման և եվրոպական հարևանության քաղաքականության հարցերով հանձնակատար Շտեֆան Ֆյուլեի հետ հանդիպմանը հայտարարել է, որ չի կարող ստորագրել համաձայնագիրը:
«Նա ուղղակի խաղում է մեզ հետ: Փորձում է ինչքան հնարավոր է՝ շատ բան քաղել մեզնից. ավելի շատ գումար, ավելի շատ զիջումներ»,- կարծում է զրուցակիցներից մեկը:
Բանակցություններում հիմնական հարցը շարունակում է մնալ Յուլյա Տիմոշենկոյի ճակատագիրը, ով, եվրոպացիների կարծիքով, դատապարտվել է քաղաքական դրդապատճառներով: Ուկրաինայի ղեկավարությունն իր հերթին ցանկանում է համաձայնագրի հետ ստանալ ֆինանսական օգնության շռայլ փաթեթ, սակայն հասկանալի չէ, թե որքան գումար է պատրաստ տրամադրել իր անդամներին սնանկությունից փրկվել փորձող ուժասպառ եղած ԵՄ-ն՝ ասվում է հոդվածում:
Միևնույն ժամանակ Կրեմլը հարևաններին նախազգուշացրել է, որ Եվրամիության հետ համաձայնագրի ստորագրումը կարող է բացասաբար ազդել Ռուսատսանի հետ առևտրային հարաբերությունների վրա:
Եվրոպացի բարձրաստիճան պաշտոնյաները սուր կերպով արձագանքում են այն բանին, ինչը կոչում են «ահաբեկում» Ռուսաստանի կողմից:
«Ոչ մի երրորդ երկիր վետո դնելու իրավունք չունի» ,- հայտարարել է Գերմանիայի կանցլեր Անգելա Մերկելը նոյեմբերի 18-ին:
Իսկ Շվեդիայի արտգործնախարար Կարլ Բիլդտը նոյեմբերի 20-ին Twitter-ի իր միկրոբլոգում գրել է, որ Մոսկվան վարում է սպառնալիքների կոշտ քաղաքականություն՝ փորձելով հասնել նրան, որպեսզի Ուկրաինան «հնազանդվի»:
Ռուսաստանի արտգործնախարար Սերգեյ Լավրովն իր հերթին հայտարարել է, որ Կիևի վրա աններելի ճնշում են գործադրում հենց եվրոպական երկրների ղեկավարները:
Եվրամիության պաշտոնյաներն իրենց ուժերի սահմաններում անում են ամեն ինչ՝ ուկրաինացիներին անհրաժեշտ ֆինանսական օգնություն ցուցաբերելու համար: Վերջերս նրանք համաձայնագիր են կազմել, որի համաձայն՝ Ուկրաինան կարող է գազ ստանալ Սլովակիայից: Այն կարող է ստորագրվել արդեն նոյեմբերի 22-ին: Բացի այդ, Բրյուսելը կարող է Կիևին տրամադրել 610 միլիոն եվրո՝ պայմանով, որ նա առաջինը պայմանավորվի ԱՄՀ-ի հետ:
Ընդհանուր առմամբ Եվրոպան հակված է մտածել, որ Ուկրաինան ժամանակ է ձգում՝ հույս ունենալով ավելի շատ շահել:
«Դա առևտուր վարելու մարտավարություն է, նրանք նայում են, թե ինչքան կարելի է ստանալ ԵՄ-ից, ինչքան՝ Ռուսաստանից»,- ասել է Եվրախորհրդարանի անդամներից մեկը:
