Շիրակի մարզի ընդհանուր իրավասության դատարանում Հարություն Մովսեսյանի նախագահությամբ սկսվում է Վաչագան Գրիգորյանի գործի դատավարությունը:
Ըստ մեղադրանքի՝ 37-ամյա գյումրեցի Վաչագան Գրիգորյանը 2013 թվականի հուլիսի 22-ին, ժամը 21-ն անց 30-ի սահմաններում իր տան պատուհանների տակ բարձր ձայնով խոսելու, մեքենայի ազդանշաններ տալու պատճառով դուրս է եկել ու վիճաբանել իր քրոջորդի Ա. Գրիգորյանի, նրա հետ գտնվող Ն. և Ռ. Պողոսյանների հետ: Վիճաբանողները քաշքշել են միմյանց:
Վաչագան Գրիգորյանի կինն ու քույրը նրան տարել են տուն:
Այնուհետև իր ծննդյան օրվա արարողությունը քեռու կողմից փչացրած համարելով ու դրա պատճառով զայրանալով՝ Ա. Գրիգորյանը կոտրել է քեռի Վաչագանի տան լուսամուտի ապակիները:
Վաչագան Գրիգորյանն արդեն ցասումնալից վիճակում տանից վերցրել է խոհանոցային դանակը, դուրս է եկել բակ ու դանակով դիտավորյալ հարվածել է Նորայր Պողոսյանի որովայնին՝ պատճառելով կյանքին վտանգ սպառնացող ծանր վնաս:
Քեռի Վաչագանին մեղադրանք է առաջադրվել ՀՀ քրեական օրենսգրքի 112 հոդվածի 1-ին մասով: Նրա խափանման միջոցը կալանավորումն է:
