Զբոսաշրջության ոլորտը Վրաստանի տնտեսության կարևորագույն ոլորտներից է, և Զբոսաշրջության ազգային վարչակազմն առավելագույն ջանքեր կգործադրի դրա հետագա զարգացման համար: «Նովոստի-Գրուզիայի» հաղորդմամբ՝ այս մասին հայտարարել է գերատեսչության ղեկավար Գեորգի Չոգովաձեն ոլորտի մասնավոր հատվածի ներկայացուցիչների հետ հանդիպման ժամանակ:
Չոգովաձեն նշել է, որ 2017 թ. արդյունքներով զբոսաշրջության ոլորտը ռեկորդային ցուցանիշ է արձանագրել ինչպես Վրաստան այցելած զբոսաշրջիկների թվով, այնպես էլ՝ եկամտի առումով:
«2017 թ. Վրաստան է այցելել 7 554 936 միջազգային զբոսաշրջիկ (նախորդ տարվա համեմատ աճը՝ 18,8%): 2017 թ. զբոսաշրջությունը երկրի տնտեսությանը բերել է ավելի քան 2 մլրդ 750 մլն դոլար, ինչը 27%-ով ավել է, քան 2016 թ.: Դա աննախադեպ ռեկորդային ցուցանիշ է: Մեր առաջադրանքն է՝ էլ ավելի զարգացնել զբոսաշրջությունը և առավելագույնս աջակցել այդ ոլորտին»,- հայտարարել է Չոգովաձեն:
