Ստամբուլի նահանգապետարանը Պոլսո հայոց նոր պատրիարքի ընտրության անցկացման վերաբերյալ իր պատասխանում նշել է, որ չի ճանաչում Գարեգին արքեպիսկոպոս Բեքչյանին՝ իբրև պատրիարքական տեղապահ. պատրիարք Մեսրոպ Մութաֆյանը դեռևս ողջ է, ուստի նոր պատրիարքի ընտրության համար անհրաժեշտ պայմաններ չկան: Պոլսո հայոց պատրիարքի ընտրությունները այս փուլում փակուղային են: Թուրքագետ, ԵՊՀ արևելագիտության ֆակուլտետի դեկան Ռուբեն Մելքոնյանն «Առաջին լրատվական»-ի հետ զրույցում, անդրադառնալով Պոլսո պատրիարքարանի շուրջ ստեղծված իրավիճակին, նշեց, որ Պոլսո պատրիարքական ընտրության շուրջ պրոցեսը գնում է թուրքական իշխանությունների գծած և ցանկալի սցենարով:
«Կա թույլ կազմակերպվածության հարց, կա երկու կողմից էլ կազմակերպչական դրույթների խախտում, այնուամենայնիվ, սրանք տեխնիկական հարցեր են: Ամենակարևորն այն է, որ թուրքական իշխանությունները և հայկական համայնքի որոշակի շրջանակներ, վերը նշված երևույթների հետևանքով խրախուսեցին, որպեսզի հերթական անգամ համայնքը չկարողանա իրագործել իր իրավունքները, չկարողանա օգտվել իր իրավունքներից, խաղաքարտերը փոխանցի թուրքական իշխանություններին, որոնք առանց այդ էլ նրանց ձեռքին էին գտնվում»,- ասաց թուրքագետը:
Ամբողջությամբ՝ տեսանյութում:
