Կառավարության նիստում արդարադատության նախարար Դավիթ Հարությունյանը ներկայացրել է «Կառավարության կառուցվածքի և գործունեության մասին» օրենքի նախագիծը, ըստ որի՝ կառավարության նիստերը դռնփակ կանցկացվեն:
ԱԺ «Ծառուկյան» խմբակցության պատգամավոր Նաիրա Զոհրաբյանը «Առաջին լրատվական»-ի հետ զրույցում նշել է, որ խնդիր է տեսնում, և պետք է բերվեն հստակ փաստեր՝ արդյոք այս ընթացքում, երբ կառավարության նիստերը եղել են բաց, որևէ խնդիր է առաջացել, որ հիմա առաջացել է նպատակահարմարություն նիստերը փակ անցկացնել:
«Սա խնդիր է առաջացնելու կառավարության գործունեության հրապարակայնության հետ: Վարչապետը՝ կառավարության ղեկավարը, ունի օրենքով սահմանված բոլոր լիազորությունները և՛ կոմիտեներում, և՛, իր մոտ հրավիրելով ոլորտային նախարարներին, կազմակերպելով ոլորտային քննարկումներ, բոլոր մտահոգիչ հարցերը, որոնք կարող են նախարարին գուցեև հրապարակային նիստի ժամանակ դնել ոչ կոմֆորտ վիճակում, քննարկել և այդ հարցերը հանել: Եվ եթե մենք գնում ենք խորհրդարանական ավելի բաց կառավարման, կարծում եմ՝ նման նորմը ուղղակիորեն սահմանափակելու է կառավարության գործունեության առավել հրապարակայնությունը»,- հավելեց պատգամավորը:
Ամբողջությամբ՝ տեսանյութում։
