Ֆրանսիացի գործարար Ալեքսանդր Ջուրին ձերբակալվել է լոնդոնյան Հիթրոու օդանավակայանում՝ 2007 թվականին Նիկոլա Սարկոզիի նախընտական արշավն ապօրինաբար ֆինանսավորելու գործի հետաքննության շրջանակում։ Այս մասին հայտնում է AFP-ն։ Նրան ձերբակալել են կիրակի։
Ֆրանսիացի քննիչները կասկածում են, որ Ջուրին հանդիսանում է Լիբիայի նախկին առաջնորդ Մուամար Քադաֆիի միջոցներից Սարկոզիի նախընտրական արշավի անօրինական ֆինանսավորման գործի առանցքային գործող անձանցից մեկը։ Քադաֆին տապալվել էր 2011 թվականին՝ Սարկոզիի գլխավորած Ֆրանսիայի ակտիվ աջակցությամբ։ Գործը Փարիզում բացվել էր դեռևս 2013 թվականին, սակայն Ջուրին չի պատասխանել իրեն ուղարկված դատական ծանուցմանը։
Ինչպես կասկածում է քննությունը, 2009 թվականին Ջուրին առնչություն է ունեցել խարդախություններին՝ կապված թանկարժեք անշարժ գույքի հետ՝ ձևակերպելով Ֆրանսիայի հարավի առանձնատներից մեկի վաճառքը լիբիացի բարձրաստիճան պաշտոնյա Բաշիր Սալեհին, ով այդ ժամանակ զբաղեցրել է Աֆրիկյան ներդրումների լիբիական հիմնադրամի նախագահի պաշտոնը և հանդիսացել Քադաֆիի խորհրդական։
Առաջին անգամ Սարկոզիի արշավի ֆինանսավորման մասին լիբիական իշխանությունները հայտարարել էին 2011 թվականի մարտի սկզբին։ Մասնավորապես, Մուամար Քադաֆին ցուցադրել էր ինչ-որ վճարային փաստաթղթեր՝ անվանելով դրանք 100 տոկոսանոց ապացույցներ։ Հոր հայտարարությունը հաստատել էր նաև որդին՝ Սայֆ ալ-իսլամը։ Euronews-ի հետ հարցազրույցում նա պահանջել էր այդ ժամանակվա Ֆրանսիայի նախագահից ճանաչել լիբիական կառավարության կողմից ֆինանսական օգնության ստացման փաստը։ Տեղեկությունը հաստատվել է նաև մի շարք անկախ լրագրողական հետաքննություններով։ Սարկոզին, իր հերթին, կտրականապես հերքում է այդ պնդումները։
