Նախատեսվում է սահմանային էլեկտրոնային կառավարման տեղեկատվական (ՍԷԿՏ) համակարգի միջոցով ճշգրիտ վիճակագրության իրականացնել Հայաստանի զբոսաշրջության ոլորտում: Այն կնպաստի տնտեսության զարգացման վրա զբոսաշրջության ազդեցության բարձրացմանը, ոլորտում առավել ճշգրիտ քաղաքականության մշակմանն ու իրականացմանը:
Այս կապակցությամբ ՀՀ տնտեսական զարգացման և ներդրումների նախարարությունը շրջանառության մեջ է դրել «Հայաստանի Հանրապետության զբոսաշրջության վիճակագրության վարման մեթոդի կատարելագործմանն ուղված միջոցառումների մասին» նախագիծը:
Ինչպես նշված է նախագծի հիմնավորման մեջ՝ զբոսաշրջության վիճակագրության բարելավումը և ստույգ վիճակագրական տվյալների հիման վրա բարձրորակ հետազոտությունների ու վերլուծությունների ապահովումը ոլորտում վարվող պետական քաղաքականության հիմնական խնդիրներից են:
«Ներկայումս Հայաստանի Հանրապետությունում վիճակագրությունը վարվում է այցելուների վիճակագրական հետազոտությունների հիման վրա ձևավորված տվյալներով՝ ՄԱԿ Զբոսաշրջության համաշխարհային կազմակերպության (ՄԱԿ ԶՀԿ) մեթոդաբանությանը համապատասխան, ինչը թեև լավագույնն է ներկա պայմաններում, սակայն առավելագույն ճշգրտություն ապահովելու տեսանկյունից կատարելագործման կարիք ունի»,- ասված է նախագծում:
Համաձայն «Զբոսաշրջության և զբոսաշրջային գործունեության» մասին ՀՀ օրենքի և 2008 թվականի փետրվարի 13-ին ՀՀ կառավարության հավանությանն արժանացած Զբոսաշրջության զարգացման հայեցակարգի` ՀՀ տնտեսական զարգացման և ներդրումների նախարարության առաջարկությամբ ՀՀ ԿԱ ազգային անվտանգության ծառայության և ՀՀ ազգային վիճակագրական ծառայության հետ համատեղ քննարկվել և մշակվել է կատարելագործված մեթոդաբանություն՝ ՍԷԿՏ համակարգի հնարավորությունների օգտագործմամբ:
«Ձևավորվել է ընդհանուր ընկալում, որ ՍԷԿՏ համակարգի օգնությամբ հնարավոր է էապես բարելավել զբոսաշրջության վիճակագրությունը` ապահովելով առավելագույն ճշգրտությամբ տվյալներ Հայաստան այցելած զբոսաշրջիկների քանակի վերաբերյալ, այդ թվում` ըստ քաղաքացիության, սեռատարիքային խմբերի և սահմանային անցման կետերի:
Դա հնարավոր է իրականացնել համապատասխան համակարգչային ծրագրի կիրառմամբ` բոլոր սահմանային անցման կետերով Հայաստան ժամանած անձանց մասին տվյալներից առանձնացնելով այն անձանց քանակները, ովքեր ՄԱԿ ԶՀԿ մեթոդաբանության և «Զբոսաշրջության և զբոսաշրջային գործունեության մասին» ՀՀ օրենքին համապատասխան համարվում են զբոսաշրջիկներ»,- նշված է նախագծում:
Ըստ նախագծի` ՍԷԿՏ համակարգի ներդրումը կնպաստի Հայաստանում կայուն, համաչափ տարածքային տնտեսական զարգացմանը, ազգային եկամտի ավելացմանը և բնակչության կենսամակարդակի բարձրացմանը:
