«Այժմ ամեն ինչ կախված է սիրիական ընդդիմության և Ասադի վարչակարգի միջև փոխհամաձայնության գալու հնարավորությունից». Արաքս Փաշայան
Սիրիայի ապագայի շուրջ Սոչիի բանակցությունների վերջին ակորդը դարձավ Թուրքիայի, Ռուսաստանի և Իրանի նախագահների միջև նոյեմբերի 22-ին տեղի ունեցած եռակողմ հանդիպումը, որի ժամանակ ընդունված համատեղ հայտարարության մեջ նշվում է, որ կողմերը շարունակելու են համագործակցել Սիրիայում խաղաղության հաստատման և կայունության ապահովման համար։ Արդեն հանդիպումից հետո տեղի ունեցած մամուլի ասուլիսի ժամանակ Վլադիմիր Պուտինը ընդգծեց, որ այս երեք երկրների ջանքերի շնորհիվ հնարավոր եղավ կանխել Սիրիայի փլուզումը:
Իրանի նախագահ Հասան Ռուհանին էլ իր հերթին հայտարարեց, որ նոր հեռանկարներ են ստեղծվել սիրիական ճգնաժամն ավարտին հասցնելու համար։
Թեմայի վերաբերյալ «Առաջին լրատվական»-ի հետ զրույցում արևելագետ Արաքս Փաշայանը նշեց, որ սա նոր փուլի մեկնարկ էր, քանի որ ԻՊ-ի դեմ հակաահաբեկչական պայքարում զգալի հաջողություններ են արձանագրվել։
«ԴԱԻՇ-ը կորցրեց իր հենակետերը թե Իրաքում, թե Սիրիայում. ազատագրվեց Դեր Զորի նահանգը, դրանից առաջ Ռաքքան էր ազատագրվել և այլն, այսինքն, կարել է ասել, որ Սիրիայի տարածքների 90%-ը կամ նույնիսկ մի փոքր ավելին ՝ այլևս ազատագրված է և սա իրականացվեց ի շնորհիվ դաշնակիցների ռազմական գործողությունների»,-նկատեց բանախոսը և այս համատեքստում հավելեց.
«Սոչիի եռակողմ գագաթաժողովը կարելի է ասել, որ արձանագրեց Ռուսաստանի, Թուրքիայի և Իրանի միջև մերձեցումը, բայց այդ գործընթացից, փաստորեն, դուրս մնացին ԱՄՆ-ն, Եվրամիությունը և արաբական առանձին երկրներ։ Սա նշանակում է, որ այս պետությունները հաջողեցին գոնե այս փուլի համար սիրիական ճգնաժամի քաղաքական լուծումը գտնելու հարցում և իրենք էլ ստանձնեցին Սիրիայի ժողովրդական Կոնգրեսի հրավիրումը, այսինքն հենց իրենք էլ փորձում են ղեկավարել հետագա գործընթացները»,- ընդգծեց Փաշայանը:
Վերջինիս դիտարկմամբ` այժմ շատ բան պայմանավորված է սիրիական ընդդիմության և Բաշար Ալ-Ասադի վարչակարգի միջև փոխհամաձայնության հասնելու հնարավորությունից և ներսիրիական դաշտում կոնսոլիդացիա տեղի ունենալու համար Սոչիի գագաթաժողովը և միայն ռազմական գործողություններում ԴԱԻՇ-ի դեմ ուղղված հաղթանակը արևելագետի խոսքերով, բնականաբար, բավարար չէ:
Թե որքանով են կողմերը պատրաստ փոխզիջումների, ըստ արևելագետի՝ ցույց կտան հետագա գործողությունները։ Նա համոզված է, որ Սիրիան միջնորդավորված պատերազմի օրինակ է, որտեղ բախվում են թե մեծ պետությունների, թե տարածաշրջանային ուժերի շահերը: Արաքս Փաշայանի կարծիքով, ըստ էության, սա Իրանի դեմ մղվող պատերազմ է։
«Սիրիական պատերազմում հաջողությունները կախված են լինելու Արևմուտքի և Իրանի միջև համաձայնության գալու հնարավորությունից։ Քանի դեռ նրանց միջև այդ համաձայնությունը չկա, ապա, բնականաբար, խնդիրներ լինելու են սիրիական հարցի վերջնական կարգավորման հետ կապված»,- ասաց Փաշայանը։
Մանրամասները՝ տեսանյութում։
