«Էրեբունի-Երևան 2795» տոնակատարության միջոցառումներին, ինչպես նաև «Եվրոպայի խորհրդի անդամ երկրների մայրաքաղաքների միջազգային համաժողովին» մասնակցելու նպատակով Երևանում գտնվող Մոսկվայի կառավարության պաշտոնական պատվիրակության անդամների հետ հանդիպման շրջանակում Երևանի քաղաքապետ Տարոն Մարգարյանը քննարկել է երկու մայրաքաղաքների միջև առկա համագործակցության ընդլայնման հետ կապված հարցեր:
Բարձր գնահատելով Երևանի և Ռուսաստանի Դաշնության մարզերի ու քաղաքների, մասնավորապես մայրաքաղաք Մոսկվայի հետ հարաբերությունների ներկա մակարդակը՝ քաղաքապետ Տարոն Մարգարյանը կարևորել է համագործակցության խորացումը քաղաքային տնտեսության կառավարման տարբեր ոլորտներում:
«Երևանի քաղաքապետարանը շահագրգռված է Մոսկվայի հետ փոխգործակցության ընդլայնմամբ: Գործակցության լայն հեռանկարներ կան հատկապես փորձի փոխանակման և ներդրումային ծրագրերի իրականացման ասպարեզում, ինչի ուղղությամբ, կարծում եմ, պետք է ակտիվացնենք մեր համատեղ աշխատանքները: Շնորհակալ եմ, որ ընդունել եք հրավերս և այսօր Երևանում եք ու մեզ հետ միասին նաև տոնում եք մեր քաղաքի տոնը»,-ընդգծել է Տարոն Մարգարյանը:
Երևանի քաղաքապետարանի տեղեկատվության և հասարակայնության հետ կապերի վարչությունից «Առաջին լրատվական»-ին հայտնում են, որ Մոսկվայի կառավարության նախարար, Մոսկվա քաղաքի բնակչության սոցիալական պաշտպանության դեպարտամենտի ղեկավար Վլադիմիր Պետրոսյանը նախ շնորհակալություն է հայտնել Երևանի օրվան նվիրված միջոցառումներին մասնակցության հրավերի համար, ապա Տարոն Մարգարյանին է փոխանցել Մոսկվայի քաղաքապետ Սերգեյ Սոբյանինի շնորհավորանքներն ու բարեմաղթանքները:
«Շարունակելով երկարամյա մեր համագործակցության լավագույն ավանդույթները, համոզված եմ, որ առաջիկայում Երևանի և Մոսկվայի միջև համագործակցությունն առավել արդյունավետ կդառնա երկու կողմերի համար էլ»,- նշել է Վլադիմիր Պետրոսյանն ու առանձնացրել այն հիմնական ուղղությունները, որի շրջանակում ակնկալվում է համագործակցության զարգացում:
Հանդիպման ընթացքում քննարկվել են նաև նոյեմբերին կայանալիք «Երևանի օրերը Մոսկվայում» ծրագրի շրջանակում քաղաքապետ Տարոն Մարգարյանի Մոսկվա այցի վերաբերյալ հարցեր:
