Սփյուռքահայ գործարար, «Արին Կապիտալ» ընկերության հիմնադիր Էդմոն Խուդյանի գործով դատական նիստերը երկարատև դադարից հետո սկսել են կայանալ, սակայն հիմա էլ դատավոր Արմեն Բեկթաշյանը բացարձակ չի տիրապետում իրավիճակին, պատշաճ չի քննում գործը:
Խուդյանի պաշտպան Նիկոլայ Բաղդասարյանը «Առաջին լրատվական»-ի հետ զրույցում ասաց, որ դատավորի համար բացարձակ կապ չունի, թե ով է խոսում, ինչ է ասում, հայցվոր կողմին առհասարակ թույլ չի տրվում առարկել հարցերի դեմ, դատավորի ուշադրությունը հրավիրել Քրեադատավարական օրենսգրքի ոտնահարման փաստերի վրա:
«Դատավարությունը շատ վատ է ընթանում արդարության իմաստով: Դատավորը ընդհանրապես գործին չի հետևում, դատական նիստի ժամանակ զբաղված է իր այլ գործերով, և իրեն բացարձակ չի հետաքրքրում, թե ինչ է կատարվում նիստի ժամանակ: Տպավորություն է, թե ով ինչ խոսի, ինչ փաստեր ներկայացնի, մեկ է՝ ինքը վերջում նույն դատական ակտն է կայացնելու: Երբ ուշադրությունը հրավիրում եմ նիստին, նա սկսում է վիրավորանքներով խոսել: Իրեն թվում է, որ եթե ինքը դատավոր է, ապա վերին արտի ցորենն է: Նա մոռանում է, որ ինքը ընդամենը պայմանագրային հիմունքով աշխատող է և ունի հստակ գործառույթներ ու պարտավորություններ, որը կոնկրետ այս գործի շրջանակներում անտեսվում է»,- ասաց Բաղդասարյանը:
Փաստաբանի խոսքով՝ ինքը համոզված է, որ դատավարության ավարտին դատավորը արտագրելու է մեղադրական եզրակացությունը, հաստատելու է դա, որը ինչ-որ տեղ բխում է նաև տուժողների շահերից, բայց խնդիրն այն է, որ իրավունքի հարցեր կան, որը դատարանը պետք է լուծի: «Խնդիրն այն է, որ այս գործելաոճը արդեն պրակտիկա է դառնում մեր դատարաններում: Դատավորների 70-80 տոկոսն այդպես է աշխատում»,- նշեց Բաղդասարյանը:
Հիշեցնենք, որ այս գործով դատավորի՝ Արմեն Բեկթաշյանի հարցով տուժող կողմը՝ Էդմոն Խուդյանն ու իր ներկայացուցիչները դիմել են արդարադատության խորհուրդ՝ նրան կարգապահական պատասխանատվության ենթարկելու համար: Կողմը կարծում է, որ դատավորը միտումնավոր տապալում է նիստերը, 7 ամսվա մեջ ընդամենը 8 նիստ է կայացել, որոնց հիմնական մասի ժամանակ բովանդակային հարցեր չեն քննարկվել: Մինչդեռ այդ դատական նիստերի համար վկաները, ինչպես նաև կողմերը ամեն անգամ արտասահմանից ժամանում են, որպեսզի ներկա գտնվեն նիստին, իսկ Բեկթաշյանը ինչ-ինչ պատճառաբանությամբ դրանք հետաձգում է: ԱԺ ներկայացված դիմումից մոտ 2 ամիս է անցել, սակայն ԱԽ-ն դեռևս վարույթ չի ընդունել, քննության չի առել, նիստ չի գումարել այդ հարցով: «Դատավորի հեչ պետքն էլ չի: Նույն ոճով շարունակում է առաջ գնալ»,- նշեց Խուդյանի պաշտպանը:
