«Առաջին լրատվական»-ի տեղեկություններով՝ Հանրապետական կուսակցության անցած շաբաթվա գործադիր մարմնի նիստի ժամանակ նախագահ Սերժ Սարգսյանը նկատողություն է արել ՀՀԿ խմբակցության ղեկավար Գալուստ Սահակյանին «Օրինաց երկիր» կուսակցությանը վերաբերող հայտարարության համար:
Մաքսային միությանը անդամակցելու մասին Ս. Սարգսյանի հայտարարությունից հետո քաղաքական դաշտում ու հատկապես Ազգային ժողովում սկսեցին հարցադրումներ հնչել, թե նախագահը նման որոշում կայացնելուց առաջ ինչու չի խորհրդակցել քաղաքական կուսակցությունների, գոնե խորհրդարանական ուժերի հետ: Ավելի ուշ հարցադրումներ էին հնչում, թե Ս. Սարգսյանն իր հայտարարության մասին նախապես տեղյակ պահե՞լ է գոնե սեփական կուսակցությանը` ՀՀԿ-ին, կամ կոալիցիոն գործընկեր ՕԵԿ-ին:
Ոչ ՀՀԿ-ից, ոչ էլ ՕԵԿ-ից կոնկրետ պատասխան չհնչեց, թե նախագահն իր հայտարարության մասին իրենց տեղյակ է պահե՞լ, թե՞ ոչ: Այդ կուսակցությունների ներկայացուցիչները խուսափում էին այդ հարցին ուղիղ պատասխանել՝ հավանաբար այն պատճառով, որ Ս. Սարգսյանի մոսկովյան հայտարարությունն իրենց համար էլ էր անակնկալ: Իսկ Գ. Սահակյանն իր հայտարարություններից մեկում նույնիսկ ասել էր, թե ՕԵԿ-ին տեղյակ պահելու կարիք էլ չկա: Կոալիցիոն կրտսեր գործընկերները Գալուստ Գրիգորիչի այդ հայտարարությունից ոչ միայն վիրավորվել էին, այլև իրենց դժգոհությունն էին արտահայտել Ս. Սարգսյանի մոտ:
ՕԵԿ-ի մեր աղբյուրների համաձայն՝ այդ կուսակցության նախագահ Արթուր Բաղդասարյանն անձամբ Սերժ Սարգսյանին տեղեկացրել է Գ. Սահակյանի հայտարարության մասին ու դժգոհել նրա հայտարարության կապակցությամբ: Գ. Սահակյանը նախապես հրաժարվել է իր արած հայտարարությունից, ինչից հետո Ս. Սարգսյանին է ներկայացվել նրա խոսքերի տպագիր տարբերակը: Գ. Սահակյանն այլևս չի կարողացել հրաժարվել իր խոսքերից: Եվ ահա նախագահը այդ առնչությամբ նկատողություն է արել Գ. Սահակյանին, թե՝ չի կարելի կոալիցիոն գործընկերոջ հասցեին վիրավորական ու արհամարհական հայտարարություններ անել:
ՕԵԿ-ում նաև կարծում են, որ Գալուստ Սահակյանի` իրենց ուղղված կիսավիրավորական կամ արհամարհական հայտարարությունները հրահրվում են Ազգային ժողովի նախագահ Հովիկ Աբրահամյանի կողմից: ՀՀԿ խմբակցության ղեկավար Գ. Սահակյանը ՀՀԿ-ում և ԱԺ-ում համարվում է Հովիկ Աբրահամյանի ազդեցության տակ գտնվող գործիչ: Խորհրդարանում նրա հայտարարությունների ուղղվածությունը հենց այդ ազդեցությամբ էլ բացատրվում են: Իսկ Հ. Աբրահամյանը ավանդաբար լարված հարաբերություններ ունի Ա. Բաղդասարյանի և ողջ ՕԵԿ-ի հետ: Նա ամեն ինչ անում է, որ խորհրդարանական գործունեության ակտիվությունից հնարավորինս հեռու պահի այդ խմբակցության պատգամավորներին, իսկ իր ազդեցության տակ գտնվող պատգամավորներին էլ տրամադրում է ՕԵԿ-ի դեմ:
