ԱՄՆ ShutDown-ի հետևանքով հնարավոր է սահմանափակվեն ՀՀ-ում ԱՄՆ դեսպանության ծախսերը: Այս մասին այսօր «Առաջին լրատվական»-ի հետ զրույցում տեղեկացրեց ՀՀ-ում ԱՄՆ դեսպանատան մամուլի խոսնակ Թագուհի Ջահուկյանը՝ պատասխանելով հարցին, թե ինչպես կանդրադառնա ԱՄՆ կառավարության ShutDown-ը ՀՀ-ում ԱՄՆ դեսպանատան աշխատանքի վրա:
Նրա հավաստիացմամբ՝ ՀՀ-ում ԱՄՆ դեսպանատան աշխատանքը չի դադարի ԱՄՆ բյուջետային ճգնաժամի հետևանքով: Մամուլի խոսնակի փոխանցմամբ՝ դեսպանատունը կշարունակի բաց մնալ հյուպատոսական ծառայությունների, այդ թվում՝ ԱՄՆ քաղաքացիներին արտակարգ ծառայությունների ապահովման և մուտքի արտոնագրերի համար:
«Դեսպանատունը շարունակում է գործունեությունը, որն անհրաժեշտ է ԱՄՆ շահերի պաշտպանության համար: Այնուամենայնիվ, այս ընթացքում մենք հնարավոր է վերանայենք որոշ ծախսեր և միջոցառումներ»,- նշեց Թ.Ջահուկյանը:
Հիշեցնենք, որ ԱՄՆ բյուջետային ճգնաժամը տեղի է ունենում առաջին անգամ 17 տարվա մեջ։ Սա եղավ այն ժամանակ, երբ ԱՄՆ Կոնգրեսի երկու պալատները չհաստատեցին նոր բյուջեն, իսկ ԱՄՆ-ում հոկտեմբերի 1-ից նոր ֆինանսական տարին է սովորաբար սկսվում:
ԱՄՆ նախագահ Օբամայի առաջարկած առողջապահական բարեփոխումներն են այս անհամաձայնության պատճառը, որոնց դեմ են հանրապետականները ու առաջարկում են դրանք հետաձգել մեկ տարով: Սրա հետևանքով ԱՄՆ պետհաստատությունները զրկվել են ֆինանսավորումից: Այսպիսով, 700 հազ պետաշխատող գտնվելու է հարկադիր արձակուրդում՝ առանց վարձատրության, մինչև կողմերը չհասնեն փոխհամաձայնության։
