Lenta.ru-ի փոխանցմամբ, Թուրքիան վճարելու է թուրքական Բոդրում հանգստավայրում անորակ ալկոհոլից թունավորված ռուս զբոսաշրջիկների բուժման ծախսերը։ Այս մասին հայտարարել է Թուրքիայի մշակույթի և զբոսաշրջության նախարարությունը։
Թուրքական կողմը նաև պարտավորվել է իր վրա վերցնել տուժած ռուս զբոսաշրջիկներին հայրենիք տեղափոխելու և սեփական հիվանդանոցներում գտնվող հիվանդների հարազատների հյուրանոցային ծախսերը:
Նշվում է, որ արդեն ձերբակալված է թուրքական զբոսանավի սեփականատերը, որտեղ էլ մայիսի 28-29-ը տեղի է ունեցել ռուս զբոսաշրջիկների զանգվածային թունավորումը։ Անորակ սպիրտային խմիչքներից օգտվելու պատճառով բժիշկների օգնությանն էր դիմել մոտ 20 մարդ, որոնցից 6-ը հոսպիտալացվել էր ծանր վիճակում։
Հիշեցնենք, որ թուրքական հիվանդանոցներում մահացել էին ռուս զբոսաշրջուհիներ՝ 1983 և 1991 թվականներին ծնված Մարիա Շալյապինան և Այգուլ Զալյաևան։ Իսկ Ռուսաստանի վերադառնալուց հետո մահացել էր 1989 թվականին ծնված Մարինա Շևելևան։
Ներկայիս դրությամբ՝ Անթալիայի ու Դենիզլիի հիվանդանոցներում են գտնվում ևս 5 ռուսներ, որոնցից երկուսի վիճակը գնահատվում է ծանր։
