Այն, ինչ կատարվեց սեպտեմբերի 3-ին, խիստ մտահոգիչ է: Այսօր կայացած մամուլի ասուլիսի ժամանակ նման տեսակետ հայտնեց «Ժողովրդավարական հայրենիք» կուսակցության նախագահ Պետրոս Մակեյանը` անդրադառնալով Մաքսային միությանը Հայաստանի անդամակցության վերաբերյալ հայտարարությանը:
Նրա խոսքով՝ սեպտեմբերի 3-ից հետո ունենք այն, ինչ ունենք: «Նման որոշման մասին հայտարարելուց առաջ պետք էր երկրում հանրաքվե անցկացնել: Այժմ պետք է անել ամեն ինչ` վերականգնելու համար երկրի ինքնիշխանությունը:
Դեպքերի նման զարգացման մեջ մեղավորության իրենց բաժինն ունեն նաև եվրոպական կառույցները: Հայաստանյան բոլոր ընտրությունները որակելով ժողովրդավարական` նրանք հայաստանյան իշխանությունների այս քայլից անակնկալի եկան և ուղղակի երեք մատի կոմբինացիա ստացան: Չեմ կարծում, որ եվրոպացիները չգիտեին, թե ընտրությունները կեղծվում էին, երկրում հարյուրից ավելի քաղբանտարկյալ կար, մինչդեռ Պրեսկոտը, Հայաստան գալով, այդ բառը չէր գործածում»,- ասաց նա:
Պետրոս Մակեյանի խոսքով՝ երեք տարի ԵՄ-ի հետ բանակցություններ վարելուց հետո անթույլատրելի է մեկ օրում հայտարարել Մաքսային միությանն անդամակցելու մասին: «Իշխանությունը երկիրը դրել է շատ ծանր վիճակում: Այժմ խնդիրը հետևյալն է. մենք պետք է ընտրություն կատարենք չարյաց փոքրագույնի մեջ»:
Ասուլիսի մյուս բանախոս՝ ՀՀԿ-ական պատգամավոր Մկրտիչ Մինասյանն իր հերթին նկատեց, որ Ռուսաստանի հետ Հայաստանի տնտեսական հարաբերությունները կարևոր են եղել և այսուհետ էլ ավելի կարևոր են լինելու: ««Եվ, և»-ի ճանապարհը փակված չէ: Պետք է ընթանալ ոչ թե երկու արժեքների հակադրման, այլ համադրման ճանապարհով: Տրամաբանությունը սրան է տանում:
Մի բան հստակ է՝ Հայաստանի անվտանգության հարցը եղել է և միշտ կմնա առաջնային խնդիր: Մենք անկախ պետություն ենք, ունենք պետական և ազգային շահեր և գործում ենք այդ շահերին համահունչ: Եվրոպացի մեր գործընկերները պետք է հասկանան սա: Մենք պետք է պահպանենք հարաբերությունները մեր ռազմավարական գործընկերոջ հետ: Տնտեսական հարաբերությունների ընդլայնումը Հայաստանին միայն ու միայն շահեկան կլինի»,- ասաց նա:
Լուսանկարը՝ PanARMENIAN Photo-ի
