Միջազգային հանրությունը ու եվրոպական կառույցները պիտի դաս քաղեն Երևանում ԵԱՀԿ գրասենյակի գործունեության դեմ Ադրբեջանի իրականացրած քայլերից, որի հետևանքով հնարավոր չի եղել համաձայնության հասնել գրասենյակի գործունեության մանդատի ժամկետը երկարաձգելու հարցի շուրջ: Հայկական կողմերն իրենց հերթին պետք է աշխուժացնեն աշխատանքը միջազգային կառույցների դեմ, որպեսզի համատեղ ուժերով պայքար մղվի Ադրբեջանի ապակառուցողական քաղաքականության դեմ: «Առաջին լրատվական»-ի հետ զրույցում այսպես մեկնաբանեց Արցախի Հանրապետության նախագահի մամուլի խոսնակ Դավիթ Բաբայանը վերջին տեղեկություններն այն մասին, որ ԵԱՀԿ Երևանի գրասենյակը շուտով դադարեցնելու է իր գործունեությունը:
– Պարոն Բաբայան, փաստորեն կոնսենսուս չի կայացել գրասենյակի մանդատի ժամկետը երկարաձգելու հարցի շուրջ: Պաշտոնական Ստեփանակերտն ինչպե՞ս է գնահատում այս իրադարձությունը, Ադրբեջանի նման կեցվածքը:
– Նախ կարելի է ափսոսանք հայտնել, որ նման բան է տեղի ունեցել: Սա ցույց է տալիս, թե ում հետ մենք գործ ունենք: Պաշտոնական Բաքվի ապակառուցողական քաղաքականությունը անկայունություն է սերմանում ոչ միայն տարածաշրջանում, այլև հիմա տեսնում ենք, որ Բաքուն փաստորեն սկսել է լուրջ խոչընդոտներ առաջացնել միջազգային կազմակերպությունների գործունեության համար: Հերիք չէ, որ Ադրբեջանը իր մոտ է փակել ԵԱՀԿ գրասենյակը, փակում է տարբեր լրատվամիջոցներ, Ադրբեջանը արդեն իսկ փորձում է միջազգային կազմակերպությունների աշխատանքին խոչընդոտել նաև այլ երկրներում: Տվյալ դեպքում նկատի ունեմ ԵԱՀԿ գրասենյակի փակումը Հայաստանում: Կարելի է ասել, որ փակվել է ԵԱՀԿ ներկայացուցչությունը ողջ Անդրկովկասում, որովհետև մինչ այդ փակվել էին գրասենյակները Բաքվում և Թբիլիսիում: Ունենք այն, ինչ ունենք: Դժբախտաբար, կոնսենսուսը երբեմն տալիս է նաև իր վատ հետևանքները: Երբ մի ահաբեկչական պետություն հնարավորություն է ունենում ազդել ինչ-որ կազմակերպության աշխատանքի վրա, այդ ազդեցությունը գրեթե միշտ լինում է բացասական, և ԵԱՀԿ գրասենյակի փակումը դրա վառ ապացույցն է:
Կարծում եմ՝ միջազգային հանրությունը և եվրոպական կառույցները պետք է մեծ դաս քաղեն սրանից և տեսնեն, թե ինչի է հանգեցնում խիստ դիվանագիտական կեցվածքը, աչքակապությունը տարբեր խնդիրների վրա, այդ թվում նաև կոռուպցիայի, որը տեղի է ունեցել եվրոպական ու միջազգային տարբեր կառույցներում:
– ԵԱՀԿ գրասենյակը և ընդհանրապես անվտանգության միջազգային կազմակերպությունները, Ձեր գնահատմամբ, ի՞նչ կարևորություն ունեն Հայաստանի և Արցախի անվտանգության համար:
– Իհարկե, մեծ կարևորություն ունեն: Ճիշտ է, չպետք է գերագնահատել, բայց խնդիրը հետևյալն է՝ քանի որ ԵԱՀԿ-ն նաև պաշտոնապես է զբաղվում ադրբեջանա-ղարաբաղյան հակամարտության կարգավորմամբ, նման քայլը Ադրբեջանի կողմից պետք է դիտարկել նաև հենց այս համատեքստում:
– Իսկ ի՞նչ հետևություններ պիտի անեն հայկական կողմերը հետագայում Հայաստանի դեմ ուղղված նման քայլերը կանխելու համար:
– Պետք է պարզապես միշտ հիշենք՝ ում հետ գործ ունենք, պետք է չանտեսենք այդ վտանգները, իսկ այն, որ Ադրբեջանը շարունակելու է նման ապակառուցողական քաղաքականությունը, փաստ է: Կտեսնենք: Պարզապես այստեղ պետք է միջազգային կառույցների հետ աշխատանքը աշխուժացվի, որպեսզի նրանք ևս համապատասխան քայլեր ձեռնարկեն, և արդեն համատեղ ուժերով պայքար մղվի Ադրբեջանի այդ դեստրուկցիայի դեմ:
– Կարծում եք, որ լծակներ չկայի՞ն այս իրավիճակը շտկելու, Ադրբեջանի վրա ազդելու համար:
– Այս առումով գրեթե չկային: Այդ լծակները, դժբախտաբար, բացակայում էին:
– Հայտնի է, որ Ադրբեջանը վետո էր դրել Հայաստանի գրասենյակի մանդատի երկարաձգման վրա՝ հայտարարելով, թե ԵԱՀԿ գրասենյակի կողմից իրականացվող ականազերծման աշխատանքները չեն համապատասխանում գրասենյակի մանդատին: Ի՞նչ աշխատանքների մասին է խոսքը, և արդյոք դրանք ինչ-որ կերպ կարո՞ղ էին ուղղված լինել Ադրբեջանի անվտանգության դեմ, ինչպես իրենք էին ասում:
– Այդ աշխատանքները որևէ ձևով չէին սպառնում Ադրբեջանի անվտանգությանը: Սա պարզապես մի «փիառ» ակցիա էր, թույլ փաստարկ, որը հակառակորդը փորձում է հրամցնել միջազգային հանրությանը: ԵԱՀԿ-ն, միջազգային տարբեր կառույցներն ու կազմակերպությունները պետք է շատ լուրջ հետևություններ անեն, որովհետև արդեն իսկ տեսնում ենք, որ նման պահվածքը լուրջ մարտահրավեր է քաղաքակիրթ աշխարհին:
– Որոշ փորձագետներ կարծում են, որ Ադրբեջանը այսպիսով դիվանագիտորեն մեկուսացրեց իրեն ԵԱՀԿ-ում: Համաձա՞յն եք դրա հետ:
– Դա ցույց կտա ժամանակը: Ընդհանրապես նման հիմք ստեղծվել է, բայց եթե Ադրբեջանը կրկին դիմեց խավիարային դիվանագիտությանը, փորձեց խավիարաթաթախ անել որոշ կազմակերպությունների, որոշ պետությունների ներկայացուցիչների, այդ ամենը կչեզոքանա: Ամեն ինչ կախված է այն հանգամանքից, թե որքանով հզոր կլինի ԵԱՀԿ-ի իմունալ համակարգը, և ինչպես կպայքարեն այսպիսի անօրինականությունների դեմ:
