Այսօր հերթական ողբերգության դեպքն է գրանցվել Մալաթիա-Սեբաստիա վարչական շրջանում։
«Փաստինֆո»–ի տեղեկություններով, Օհանովի 2 հասցեում հորեղբայրը դանակի գործադրմամբ սպանել է եղբորորդուն։
Դեպքի առթիվ «Առաջին լրատվական»-ից հաջողվեց պարզել, որ երեկ առավոտյան 08.30-ի սահմաններում ոստիկանության Մաշտոցի բաժին հաղորդագրություն է ստացվել, որ «ձախ ոտքի հետին հատվածի պատռված արյունահոսող վերք» ախտորոշմամբ բուժօգնության է տեղափոխվել 1990 թ. ծնված Վահագ Պետրոսյանը: Ինչպես ոստիկաններին ներկայացրել է Վ. Պետրոսյանի մայրը, որդին վնասվածքը է ստացել տանը` աստիճաններից վայր ընկնելու հետևանքով:
Նշանակվել է դատաբժշկական փորձաքննություն, իսկ նույն օրը՝ ժամը 23.30-ին, հիվանդանոցից հաղորդում է ստացվել, որ Վ. Պետրոսյանը մահացել է:«Առաջին լրատվական»-ի տեղեկություններով՝ վեճը եղել է կենցաղային բնույթի, իսկ հորեղբայրը չարաշահած է եղել ալկոհոլը:
Ոստիկանության ձեռնարկված օպերատիվ-հետախուզական և քննչական միջոցառումների շնորհիվ պարզվել է, որ սեպտեմբերի 4-ին, ժամը 00.00-ի սահմաններում, Օհանով փողոցի թիվ 2 շենքի մոտ, վիճաբանության ժամանակ, 1974 թ. ծնված Գրիգոր Պ.-ն խոհանոցային դանակով հարվածել է Վ. Պետրոսյանի ձախ ոտքի հետին հատվածին և պատճառել մարմնական վնասվածք, ինչի հետևանքով վերջինս հիվանդանոցում մահացել է: Գրիգոր Պ.-ն բերման է ենթարկվել բաժին և տվել խոստովանական ցուցմունք:
Հանցագործության գործիք դանակը հորեղբայրը նետել է եղել փողոցի աղբարկղը, որն այժմ առգրաված է:
Փաստի առթիվ ՀՀ քրեական օրենսգրքի 112 հոդվածի 2-րդ մասի 14-րդ կետի հատկանիշներով հարուցվել է քրեական գործ:
Կատարվում է նախաքննություն:
