«Առաջին լրատվական»-ի զրուցակիցն է ԱԺ պատգամավոր Արագած Ախոյանը, ով ՀՀԿ ռեյտինգային ցուցակով առաջադրվել է Արագածոտնի մարզում։ Մամուլը գրել է, որ նախօրեին նրա և նախկին ՀՀԿ-ական, այս ընտրություններին ԲՀԿ ցուցակով առաջադրված՝ «Լուսակերտ» ընկերության սեփականատեր Խաչիկ Մանուկյանի միջև բախում է եղել։
– Պարոն Ախոյան, ի՞նչ միջադեպ է եղել Ձեր և ԲՀԿ ցուցակով առաջադրված Խաչիկ Մանուկյանի միջև։
– Ոչ մի բան էլ չի եղել։ Չգիտեմ՝ ով է այդ աղմուկը բարձրացրել, անունն էլ դրել են բախում։ Ոչ մի բախում էլ չի եղել։ Տհաճ խոսակցություն է եղել, բայց դա միջադեպ չի, ոչ էլ բախում, որի մասին կարելի է խոսել։ Մարդիկ պարզապես ցանկացել են ցանկալին իրականության տեղ անցկացնել։
– Իսկ հիմա ինչպիսի՞ հարաբերություններ ունեք Խաչիկ Մանուկյանի հետ։ Հարթվե՞լ է խնդիրը։
– Ամեն ինչ նորմալ է։ Տղա է, էլի, թող իր համար ման գա։
– Բաց Ձեր մրցակիցն է։
– Ես նրան մրցակից չեմ համարում։
– Պարոն Ախոյան, Ձեր կարծիքով՝ այս ռեյտինգային ընտրակա՞րգն է պատճառը, որ այս օրերին բախվում են թեկնածուները։ Արդեն երեք-չորս տեղամասում նման միջադեպեր են եղել։
– Իհարկե, շատ բարդ պրոցես է սա։ Բայց պետք է ունենալ բարձր գիտակցություն։ Պետք է հասկանալ, որ սա ընտրապայքար է, սա ֆուտբոլի պես մի բան պետք է լինի։ Այսինքն՝ թիմային հաղթանակ է։ Թիմի մասին պետք է մտածել, այլ ոչ թե անձնական հարցեր լուծել։ Նախագահը հստակ ասաց՝ չեմպիոնության խնդիր դրված չէ։ Ասաց՝ չեմպիոնություն կարող եք անել փոքր շրջանակներում, փոքր շրջանակներում կարող եք գլուխ գովել։ Կարևորը թիմը հաղթի։ Ես առաջնորդվում եմ այդ գաղափարով, քանի որ վաղը նայելու ենք իրար երեսի և ամաչելու ենք մեր արածների համար, ամաչելու ենք այսօրվա համար։ Այնպես որ՝ բոլորին խոհեմության կոչ եմ անում և հորդորում եմ առաջնորդվել թիմային գաղափարով։ Ամեն ինչ լավ կլինինի։
– Պարոն Ախոյան, նախօրեին Հայաստանում ԱՄՆ դեսպանը թեկնածուներին հորդորել էր չփորձել գնել ընտրողների քվեն, քանի որ դա հանցագործություն է։ Ինչպե՞ս եք վերաբերվում այս հորդորին և հետևելո՞ւ եք դրան։ Այս օրերին մենք տեսնում ենք, որ տարբեր թեկնածուների կողմից առաջարկվող ընտրակաշառքի չափերը գերազանցում են մեկը մյուսին։
– Ինձ համար զավեշտալի մի բան կա։ Էդ ընտրակաշառք կոչեցյալը դարձել է ուրվական. բոլորը խոսում են դրա մասին, բայց ոչ ոք չի տեսնում դա։ Այդ թվում՝ այդ արատավոր երևույթի մասին խոսում են պատգամավորներ, բայց ոչ ոք ընթացք չի տալիս դրան։ Հետևաբար՝ կա՛մ համարձակություն չունեն, կա՛մ հերյուրանք է դա։ Թող կոնկրետ փաստի մասին խոսեն և օրենքի շրջանակներում ընթացք տան դրան։ Նույնիսկ արդեն վիրավորական է։ Բա լավ՝ էսքան խոսում են, մեկը չի՞ կարում ընթացք տա դրան ու ապացուցի, որ կաշառք է բաժանվում։ Ես կարծում եմ, որ արդեն կարելի է քրեական գործ հարուցել իմանալ չհայտնելու հոդվածով, որովհետև եթե հայտնում ես, պետք է ապացուցես։
– Բայց դա իրավապահ մարմինների գործն է։ Այս օրերին տարբեր մարդիկ ահազանգում են դրա մասին։ Տարբեր թեկնածուների կողմնակիցներ շրջում են ընտրողների տներով, ցուցակագրում և խոստումներ տալիս։ Այդ մասին բարձրաձայնվում է, իսկ դրան ընթացք տալը իրավապահների գործն է։ Այդպես չե՞ք կարծում։
– Ես ասում եմ՝ եթե խոսում են, պետք է ապացուցեն։ Թե չէ արդեն եռանիշ, վեցանիշ թվերից են խոսում։ Պետք է ամոթ ունենալ։ Եթե բարձրաձայնում ես, պետք է ապացուցես։ Իհարկե, այն մարդիկ, որ սպասում են այդ կաշառքին, ցավալի է, գնում են, վերցնում են այդ փողը, հետո տարիներ շարունակ փնովում են հայրենիքը։ Սրան պետք է լուրջ վերաբերվել։ Թող չվերցնեն. տալիս են, թող չվերցնեն։ Ես սա կարող եմ ասել։
