Օրերս կառավարության նիստում որոշում է կայացվել առաջիկայում սահմանամերձ գյուղերում դպրոցների և մանակապարտեզների մոտ պատնեշներ և թաքստոցներ կառուցել, որպեսզի բնակչությունը պաշտպանվելու և պատսպարվելու տեղ ունենա: Այդ որոշման համաձայն՝ նաև իրավիճակի սրման դեպքում զենք պետք է բաժանվի սահմանամերձ բնակավայրերի բնակչությանը: «Առաջին լրատվական»- ի հետ զրույցում Առաջին հետախուզադիվերսիոն ջոկատի հիմնադիր-հրամանատար Վովա Վարդանովը կարծիք հայտնեց, որ այդ ամենը պետք էր անել դեռ շատ վաղուց: Նա նշեց, որ մոտ 15 տարի առաջ իրենք բարձրացրել են թաքստոցների հարցը, բայց լսող չի եղել: «Որոշումն իհարկե ուշացած է, բայց դա անհրաժեշտություն է. լավ է ուշ, քան երբեք»,- նշեց Վ. Վարդանովը:
Նրա դիտարկմամբ՝ սահմանամերձ գյուղերի բնակիչները սահմանապահներ են, պետք է այնտեղ աշխատատեղեր բացել և առաջին հերթին ապահովել նրանց անվտանգությունը, հատկապես դպրոցների ու մանկապարտեզների մոտ պետք է թաքստոցներ լինեն և պատնեշներ, որոնք կփակեն հակառակորդի տեսադաշտը: Վ. Վարդանովի կարծիքով՝ սահմանամերձ գյուղերի խաղաղ բնակչությանը պետք է զենք բաժանել և տանը զենք ունենալը դեռ քիչ է, պետք է վարժանքներ անցկացնեն, որպեսզի անհրաժեշտության դեպքում կարողանան աջակցել դիրքապահներին, պաշտպանական համակարգի մաս կազմեն:
««Ազգ-բանակ»-ն այն է, որ գյուղացու մահճակալի տակ զենք է դրված ու կանսերվա, որի մեջ պաշտպանության նախարարի հրամանն է… «Ազգ-բանակ»-ն այն է, երբ որ ամեն մեկը գիտի իր անելիքը» – նշեց Վ. Վարդանովը՝ հավելելով, որ «կշեռքից» պետք չէ գցել նաև ծերերին:
Վ. Վարդանովը նաև կարծիք հայտնեց, որ ճիշտ կլինի, եթե զինվորները ծառայեն այն տարածքում, որն իրենք լավ են ճանաչում, ոչ թե լեռնային տարածքի բնակչին տանեն Արարատյան դաշտավայր, իսկ դաշտավայրի բնակչին՝ լեռնաանտառային տարածք, և ադապտացվելու համար ամիսներ պետք լինեն: «Եթե այս ամենը մենք մինչև հիմա չենք հասկանում, նշանակում է, որ մեր զինկոմիսարիատներում և ՊՆ համապատասխան կառույցներում դեռ ծառայում են սովետական սպաներ… Մարդիկ շռայլ են մոտենում մարդկային ռեսուրսին, բայց մարդկային ռեսուրսը շատ թանկ բան է»:
Մանրամասները՝ տեսանյութում:
