Վերաքննիչ քրեական դատարանում ավարտվել է Արմեն Թադևոսյանի գործով բերված վերաքննիչ բողոքի քննությունը:
Երևանի բնակիչ, 42-ամյա Արմեն Թադևոսյանին Մալաթիա-Սեբաստիա վարչական շրջանների ընդհանուր իրավասության դատարանը Տիգրան Պետրոսյանի նախագահությամբ մեղավոր է ճանաչել երկու դրվագով հանցագործության մասին ակնհայտ սուտ մատնություն կատարելու և ծեծի, բռնություն գործադրելու համար՝ ՀՀ քրեական օրենսգրքի 333 հոդվածի 2-րդ մասի 1-ին կետով և 118 հոդվածով:
Ըստ դատական ակտի՝ 2012 թվականի նոյեմբերի 18-ին, ժամը 22-ն անց 5 րոպեին Արմեն Թադևոսյանն իրեն պատկանող ավստրիական հեռախոսահամարից զանգահարել է ոստիկանության Երևան քաղաքի վարչության հերթապահ մաս, ներկայացել որպես Օտտո Ֆրանցի Միտրաբաուեր ու, գիտակցելով, որ իր տրամադրած տեղեկությունը կեղծ է, կատարել է սուտ մատնություն. հայտնել է, թե նախորդ օրը՝ նոյեմբերի 17-ին, «Եվրոպա» ռեստորանի մոտ երկու անհայտ անձինք դանակի սպառնալիքով հափշտակել են իր փողերն ու սպառնացել, թե կսպանեն իր դստերը, եթե կատարվածի մասին հայտնի:
Միաժամանակ զանգահարողը հայտնել է, թե Ռայա Զ.-ն իր 16-ամյա դստերը թմրանյութ է հյուրասիրել, ընդհանրապես նա զբաղվում է թմրամիջոցների վաճառքով:
Մի քանի օր անց՝ նոյեմբերի 22-ին, ժամը 19-ն անց 50 րոպեին Արմեն Թադևոսյանն արդեն հայկական հեռախոսահամարից նորից զանգահարել է ոստիկանություն, ներկայացել որպես «միստր Բաուեր» և հայտնել է, թե Ռայա Զ.-ն թմրամիջոցներ է վաճառում:
Նույն օրը, ժամը 20-ն անց 30-ի սահմաններում Արմենն անձամբ՝ որպես Արմեն, այցելել է հիշյալ՝ իր ախոյան Ռայայի տուն ու ծեծի ենթարկել նրան՝ պատճառելով մարմնական թեթև վնասվածքի հատկանիշներ չպարունակող վնասվածքներ:
Ընդհանուր իրավասության դատարանում Արմեն Թադևոսյանն իրեն մեղավոր է ճանաչել, զղջացել ու միջնորդել, որ գործը քննվի արագացված կարգով:
Դատարանը հաշվի է առել, որ Թադևոսյանի խնամքին մեկ անչափահաս երեխա կա:
Արմեն Թադևոսյանը դատապարտվել է 1 տարի 6 ամիս ազատազրկման և 100 հազար դրամ տուգանքի: Նրա նկատմամբ պայմանական դատապարտություն է կիրառվել ու սահմանվել 1 տարի փորձաշրջան:
Դատավճռի դեմ վերաքննիչ բողոք էր բերել մեղադրողը, ում կարծիքով Թադևոսյանի նկատմամբ պայմանական դատապարտություն չպետք է կիրառվեր, այլ պետք է սահմանվեր հանցագործության ծանրությանը համապատասխան պատիժ:
Վերաքննիչ քրեական դատարանը մերժել է մեղադրողի բողոքը և ընդհանուր իրավասության դատարանի դատավճիռը թողել է անփոփոխ:
