Երկու խարդախներ ծրագիր են մշակել, որի զոհ պետք է դառնային բրիտանական փոստի աշխատակիցները: Սակայն անհեռատեսությունը նրանց բացահայտման պատճառ է դարձել:
Մեծ Բրիտանիայի երկու բնակիչներ՝ 29-ամյա Նաթան Մենչը և 39-ամյա Նայջել Բեննեթը որոշել էին հեշտությամբ գումար վաստակել: Նրանք պլանշետների տուփերը սառույցի կտորներով են լցրել, դրանք որպես ծանրոց փաթեթավորել, իսկ հետո՝ ապահովագրել:
Այդ պլանի իմաստը հետևյալում էր` մինչև սառույցի կտորներով ծանրոցը կհասներ հասցեատիրոջը, սառույցը կհալվեր, և տուփերը դատարկ տեղ կհասնեին: Այդ կերպ ապահովագրված թանկարժեք ծանրոցը կորցրած փոստի աշխատակիցներն, ըստ օրենքի, փոխհատուցում կվճարեին, որը հանցագործների հաշվարկով հավասար կլիներ 2500 ֆունտ սթեռլինգի:
Նրանք հաշվի չեն առել միայն մեկ հանգամանք, որ այդ օպերացիան իրականացվում էր մայիսին, և բարձր ջերմաստիճանի պայմաններում սառույցը միանգամից սկսել է հալվել: Երբ տղամարդը փոստ է մտել ծանրոցով, նրա շապիկը թաց է եղել, սակայն աշխատակիցներին նա հայտնել է, որ տուփի մեջ պլանշետներ են: Որոշ ժամանակ անց, երբ տղամարդն արդեն հեռացել է, փոստի ածշատակիցները ծանրոցի տակ լճացած ջուր են նկատել, սակայն չեն համարձակվել բացել այն: «Ծանրոցն» ինքն իրեն քանդվել է և նրանք տեսել են, որ այնտեղ ոչ մի պլանշետ էլ չկա:
Ոստիկանությունը, ծանոթանալով փոստի աշխատակիցների ցուցմունքներին, հեշտությամբ գտել է խարդախներին:
Դատարանը նրանց դատապարտել է 12 ամսվա ազատազրկման և 500 ֆունտ սթեռլինգ տուգանքի:
