Հուլիսի 9-ին, ժամը 16.00-ին Երևանի Մալաթիա-Սեբաստիա վարչական շրջանների ընդհանուր իրավասության դատարանում` նախագահությամբ Կարեն Ֆարխոյանի, կշարունակվի հետընտրական «լիցքաթափման» դրվագային գործընթացներից մեկը: Խոսքը Երևանի ավագանու ընտրությունների ժամանակ արձանագրված ընտրախախտման մասին է, որը տեղի էր ունեցել ընտրախախտումներով սովորաբար աչքի ընկնող Մալաթիա-Սեբաստիա համայնքում կամ ինչպես ասում են` ԱԺ պատգամավոր, հայտնի օլիգարխ Սամվել Ալեքսանյանի «տարածքում»:
Ամբաստանյալները երկուսն են` 57-ամյա Դավիթ Մխիթարյանը և 28-ամյա Էդգար Մանուկյանը: Երկուսով փորձել են երեք քվեաթերթիկով կրկնակի քվեարկություն անել և երեք ձայնով ավելացնել Երևանի ավագանու թեկնածուներից մեկի ձայները: Ըստ մեղադրանքի` Դավիթ Մխիթարյանը, լինելով Մալաթիա-Սեբաստիա համայնքի բնակիչ, 2013թ. մայիսի 5-ին ժամը 13-ի սահմաններում, Երևան քաղաքի ավագանու ընտրությունների ժամանակ գալով Անդրանիկի փողոցի 73 հասցեում գտնվող թիվ 8/23 ընտրատեղամաս, միանգամից երեք քվեաթերթիկներում թեկնածուի անվան դիմաց համապատասխան նշում կատարելով և քվեատուփը գցելու եղանակով փորձել է քվեարկել մեկից ավելի անգամ, սակայն ընտրական հանձնաժողովի անդամ Ք. Գևորգյանը նկատելով դա, թույլ չի տվել նրան քվեարկել: Այսինքն, Դավիթ Մխիթարյանին մեղադրանք է առաջադրվել կրկնակի քվեարկության փորձի համար /քր. օրի 34-153 հոդ./:
Իսկ Էդգար Մանուկյանը մեղադրվում է Դավիթ Մխիթարյանի` կրկնակի քվեարկելու փորձին օժանդակելու մեջ /քր. օրի 38-34-153 հոդ./: Է. Մանուկյանը, ընտրությունների ժամանակ, նույն այդ տեղամասում լինելով ընտրական հանձնաժողովի անդամ` ընտրողներին քվեաթերթիկ և ծրար տրամադրող անձ, Դավիթ Մխիթարյանին տրամադրել է միանգամից երեք հատ ծրար և երեք հատ քվեաթերթիկ:
Եթե մեղադրանքը հաստատվի, նրանք կպատժվեն տուգանքով` 500.000-700.000-ի չափով, կամ ազատազրկմամբ` 2-3 տարի ժամկետով: Նրանց դեպքում կստացվի, որ մեկ կեղծվելիք քվեաթերթիկն արժե մոտավորապես 165 հազարից 233 հազար դրամ կամ կամ առավելագույնը` 1 տարվա ազատազրկում:
Ամբաստանյալների նկատմամբ խափանման միջոց է ընտրված չհեռանալու մասին ստորագրությունը:
Երկու դատական նիստ չի կայացել մեղադրողի բացակայության պատճառով:
Իսկ ընդհանրապես, այս համայնքում ցանկացած տրամաչափի ընտրությունից հետո դատական թեթև գործընթացներ գրեթե միշտ լինում են, որոնք սովորաբար ավարտվում են տուգանքով կամ պատիժները պայմանականորեն չկիրառելով:
