ՄԻԱԿ նախագահ Լևոն Մարտիրոսյանը «Առաջին լրատվական»-ի հետ զրույցում ասաց, որ մանրամասն տեղյակ չէ, թե զբաղեցրած պաշտոնից ինչու է ազատվել իր ղեկավարած կուսակցության քարտուղար Արա Հովսեփյանը: Հիշեցնենք, որ վերջինս «Հյուսիս-Հարավ» ճանապարհային ԾԻԳ-ի տնօրենն էր և աշխատանքից ազատվեց մոտ երկու ամիս առաջ: Դրանից հետո Վերահսկիչ պալատի նախագահ Իշխան Զաքարյանը հայտարարեց, որ այդ ճանապարհաշինարարությունն իրականացվել է բացարձակ անորակ և խայտառակ վերահսկողության պայմաններում:
Ծրագիրը նախատեսում է Հայաստանի և Վրաստանի սահմանային կետից ավելի քան 500 կմ բարձրակարգ, բետոնյա ծածկույթով ավտոմոբիլային ճանապարհի կառուցում, որը պետք է ավարտվի 2017 թվականին: Ծրագրի ընդհանուր արժեքը 962 միլիոն դոլար է, որի հիմնական մասը Ասիական զարգացման բանկի տրամադրած վարկ է: Նշենք, որ ՎՊ բացահայտումներից հետո լուրեր տարածվեցին, թե Ա. Հովսեփյանը հենց այդ խախտումների պատճառով է ազատվել պաշտոնից: Սակայն ավելի վաղ շրջանառվող տեղեկությունների համաձայն՝ Ա. Հովսեփյանն ազատվել է այդ ծրագրի հետ կապված ու դրա միջոցով ֆինանսական հոսքեր ունենալու նպատակով ներիշխանական հակասությունների արդյունքում:
Ըստ նույն տեղեկությունների՝ տրանսպորտի և կապի նախարար Գագիկ Բեգլարյանն է ցանկացել ծրագրի և դրա ֆինանսական հոսքերի վրա վերահսկողություն ունենալ, քանի որ ԾԻԳ-ը և ճանապարհի շինարարությունը նրա ղեկավարած նախարարության վերահսկողության ներքո են: Նշենք, որ ծրագրի մեկնարկի ժամանակ Գ. Բեգլարյանը դեռ նախարար չէր, իսկ նախարար դառնալուց մեկ տարի անց նրան հաջողվեց ազատել Ա. Հովսեփյանին ու փոխարենը նշանակել իր համար ավելի ընդունելի մեկին:
Լ. Մարտիրոսյանը տեղյակ չէր նման մանրամասներին և ընդամենը գիտեր, որ Ա. Հովսեփյանը սեփական դիմումի համաձայն է դուրս եկել գործից: «Ինքը որոշել է, որ չի ուզում այնտեղ աշխատել: Նա լավ մասնագետ է, լավ կրթություն ունի և հաստատ լավ աշխատանք կգտնի: Հիմա հանգստանում է, կարծեմ քաղաքում էլ չի: Կգա, ավելի լավ աշխատանք կգտնի: Չէր ուզում այդտեղ աշխատել և դուրս եկավ: Որքան տեղյակ եմ, չարաշահումները շինարարի հետ կապ ունեն, եթե չարաշահումներ են եղել դրանք: Խոսքը անորակ աշխատանքի մասին էր: Եվ ես այդ գործերին տեղյակ եմ այնքանով, որքանով որ բոլորն են տեղյակ»,- պատասխանեց ՄԻԱԿ ղեկավարը:
Բայց չէ՞ որ Ա. Հովսեփյանն իր կուսակցության քարտուղարն է: Իրեն չի՞ հուզում, թե ինչու է պաշտոնից ազատվում իր քաղաքական գործընկերը, և նրա ղեկավարած հիմնարկում ՎՊ-ն ինչ չարաշահումներ է հայտնաբերել: Չէ՞ որ դա կարող է բացասաբար ազդել նաև իր կուսակցության վարկանիշի վրա: «Չի հուզում: Կուսակցությունն ինչ կապ ունի այստեղ: Ընդամենը աշխատանք է, որից ինքը հրաժարվել է: Կուսակցի վարքագծի հետ բացարձակապես խնդիր չկա: Նրան որևէ բանի մեջ չեն մեղադրում: ՎՊ նախագահը մի քանի անգամ խոսել է և ասել, որ գոնե նրան չի մեղադրել որևէ բանի մեջ: Նա հետո կարող է ավելի լավ գործի անցնել»,- պատասխանեց Լ. Մարտիրոսյանը:
Հիշեցնենք, որ մինչ այդ պաշտոնին նշանակվելը Ա. Հովսեփյանը «Հազարամյակի մարտահրավերներ Հայաստան» գրասենյակի տնօրենն է եղել:
