Հայաստանի կոմունիստական կուսակցության ղեկավար Ռուբեն Թովմասյանը Հայաստանի գլխին կախված ամենամեծ աղետը համարում է արտագաղթը, ինչը նրա համոզմամբ՝ համընդհանուր թանկացումների, գործազրկության և աղքատության արդյունք է: Այսօր լրագրողների հետ հանդիպմանը նա ասաց, որ խնդիրը լուծելու համար պետք է ստեղծել աշխատատեղեր և կազմակերպել ներգաղթ:
Բանախոսի համոզմամբ՝ աշխարհում հիմա ծանր քաղաքական վիճակ է, ինչի ապացույցն են Սիրիայում և Թուրքիայում տեղի ունեցող դեպքերը: Նրա խոսքով՝ Հայաստանը ևս անմասն չի կարող մնալ այդ իրադարձություններից. «Գազի գինը բարձրացվեց՝ Ռուսաստանին մեղադրեցին, սակայն պետք է հիշել, որ մեր ռազմավարական դաշնակիցը եղել է Ռուսաստանը, և Հայաստանը հավերժ պիտի լինի Ռուսաստանի դաշնակիցը»,- նշեց պրն Թովմասյանը:
Խոսելով վերջին շրջանի ներքաղաքական իրավիճակի մասին՝ նա ասաց, որ այժմ քաղաքական այնպիսի «սեզոն» է ստեղծվել, երբ բոլոր ուժերը լռում են. «Ընտրություններից հետո բոլորը սկսում են լռել՝ անգամ այն դեպքում, երբ ՀՀ-ում արդար ընտրություններ տեղի չեն ունենում»:
Բանախոսը խոսեց նաև կուսակցության ապագա գործողությունների մասին: Նա նշեց, որ չնայած իրենց շարքերում տարեցների թիվը շատ է, սակայն տարբեր մարզերից մարդիկ են անդամագրվում. «Այժմ մենք նայում ենք մեր շարքերի ամրությանը: Ես համոզված եմ՝ մարդկանց մեծ մասը սոցիալիստական մտածելակերպ ունի: Մարդիկ ուզում են, որ իրենց երեխան լավ ապրի, հարկեր չունենա. մենք ժողովրդի հետ պետք է խոսենք ճշմարտության լեզվով»:
Լուսանկարը՝ PanARMENIAN Photo-ի
