2017 թվականին ավելի քան 1.19 մլն փախստականներ, ընդ որում՝ 40 տոկոսը սիրիացիներ, այլ երկրներում վերաբնակեցման կարիք կունենան։ Այս մասին ասվում է Փախստականների հարցերով ՄԱԿ-ի գերագույն հանձնակատարի վարչության զեկույցում, որը հրապարակվել է Ժնևում։ Այս մասին փոխանցում է TASS գործակալությունը։
«Չնայած որոշ երկրների կողմից վերաբնակեցման համար քվոտաների մեծացմանը, գլոբալ հնարավորությունների ընդլայնմանը և առաջարկների աճին, վերաբնակեցման կարիք ունեցողների ենթադրյալ թիվը գերազանցում է 1,19 միլիոնը»,- նշել է վարչությունը։ Ամենամեծ խումբը կազմում են սիրիացի փախստականները (40%)։ Հաջորդը սուդանցիներն են (11%), աֆղանները (10%)։ Խոսքը մարդկանց մասին է, որոնք երրորդ երկրներում վերաբնակեցման կարիք ունեն, քանի որ նրանք մի շարք պատճառներով չեն կարող տուն վերադառնալ կամ ինտեգրվել ներկայումս իրենց ընդունած պետություններում։
Վարչությունում սպասում են, որ պետությունները հաջորդ տարվա համար կառաջարկեն փախստականների վերաբնակեցման համար մոտ 170 հազար տեղ։ Դա զգալիորեն ավելի է, քան ընթացիկ տարում (143 հազար)։
Վերաբնակեցումից բացի՝ ՄԱԿ-ում ուսումնասիրում են խնդրի լուծման հավելյալ ուղիները։ Զեկույցում ասվում է, որ 2015 թվականին ԱՄՆ-ը վերաբնակեցման համար տրամադրել է ավելի քան 82 հազար տեղ, Կանադան՝ մոտ 23 հազար, Ավստալիան՝ ավելի քան 9000։
