Իրանական Mehr լրատվական գործակալության փոխանցմամբ՝ Իրանի գերագույն առաջնորդ, այաթոլլահ Ալի Խամենեին հայտարարել է, որ Իսլամական Հանրապետությունը ներկայումս ապրում է ավելի բարդ իրավիճակ՝ համեմատած անցյալի հետ։
Խամենեին ուղերձ է հրապարակել Իրանի 10-րդ գումարման խորհրդարանի աշխատանքների մեկնարկի կապակցությամբ, որում նշել է, որ տարածաշրջանի ու աշխարհի ներկայիս պայմանները, ինչպես նաև իմպերիալիստների միջազգային արկածախնդրությունը և նրանց հետևորդները պատճառ են դարձել, որ Իսլամական Հանրապետությունը բախվում է ավելի բարդ իրավիճակի՝ համեմատած անցյալի հետ։
Խամենեի խոսքերով՝ բարդությունների դեմ պայքարը պահանջում է զգոնություն, ուժեղ կամք ու Իրանի բոլոր պաշտոնյաների նախաձեռնությունը։ Նա հավելել է, որ իրանցի պատգամավորները պետք է խորհրդարանը դարձնեն կայուն և հենակետ՝ Իրանի հեղափոխական ժողովրդի համար։ Իրանի գերագույն առաջնորդը նաև բարձր է գնահատել խորհրդարանական վերջին ընտրությունների ժամանակ քվեարկությանը իրանցիների բարձր մասնակցությունը։
