Ոստիկանությունը ցրել է Փարիզում Հանրապետության հրապարակում վրանային ճամբարը, որը ձգողության կենտրոն է դարձել սոցիալիստների և անձամբ երկրի նախագահ Ֆրանսուա Օլանդի քաղաքականությանը անհամաձայն ֆրանսիացիների համար: Այս մասին հայտնում է TASS-ը:
Գործողությունն իրականացվել է ուժեղացված պահպանությամբ, ոչ մի պատահար չի արձանագրվել: Բողոքի շարժման կազմակերպիչները, սակայն, արդեն հայտարարել են, որ ակցիաներն այս կամ այն ձևով կշարունակվեն իշխանությունների գործողություններին անհամաձայնությունը ցույց տալու համար: «Մենք Հանրապետության հրապարակը լքում ենք միայն ժամանակավորապես»,- պնդում են ցուցարարները:
Իսկապես, վրանային ճամբարի ապամոնտաժումից անմիջապես հետո Հանրապետության հրապարակում միտինգի նոր հայտ է ներկայացվել:
Ցույցերի պատճառ է դարձել Ֆրանսիայի աշխատանքային օրենսդրության բարեփոխման նախագիծը: Կառավարությունը մի շարք վիճելի նախաձեռնություններ է առաջարկել երկրի աշխատաշուկան լիբերալացնելու համար:
2 ամիս երկրում չեն դադարում բողոքի ակցիաները. միայն մարտին կազմակերպվել է 2 համազգային գործադուլ, որոնց, տարբեր տվյալներով, մասնակցել է 500 000-1,2 մլն ֆրանսիացի:
Վարչապետ Մանուել Վալսը հայտարարել է, որ կառավարությունը չի պատրաստվում նահանջել:
