Ինչպես արդեն տեղեկացրել ենք, ԲՀԿ խմբակցության պատգամավոր Կարո Կարապետյանը հունվարի 26-ին սնանկ է ճանաչվել ՀՀ Արարատի և Վայոց Ձորի մարզերի ընդհանուր իրավասության դատարանի վճռով: Պատգամավոր Կարո Կարապետյանի պարտատերերի առաջին ժողովը նշանակվել է մայիսի 12-ին Վեդիի դատարանում:
Պատգամավորին պատկանող «Շահումյանի գինու-կոնյակի» գործարանը անցյալ տարի խաղող է մթերել քաղցրաշենցիներից և քաղցրաշենցի 450 ընտանիք դեռեւս չի ստացել հանձնած խաղողի բերքի գումարը: Երեկ արտակարգ իրավիճակ էր ստեղծվել Արարատի մարզում: Քաղցրաշեն գյուղի բնակիչները՝ ի նշան բողոքի, խաղողի մթերման գումարները չտալու հետ կապված՝ փակել են Երևան-Մեղրի ավտոճանապարհի Քաղցրաշենի հատվածի վարչական տարածքը՝ պահանջելով իրենց գումարները: Ինքը՝ Կարո Կարապետյանը հայտարարել է, որ թեև գործարանի տարածքն իրեն է պատկանում է, սակայն այն վարձակալել է Ավետիք Սարգսյանը, որն էլ գյուղացիներից խաղող է մթերել:
Այսօր ԱԺ-ում գյուղնախարարից հետաքրքվեցինք, թե ինչպես են վերադարձվելու գյուղացիների գումարները, երբ մթերող պատգամավորը սնանկ է ճանաչվել: «Ես տեղյակ չեմ սնանկության մասին»,- հայտարարեց նախարարը՝ հավելելով, որ մթերողի հետ պայմանավորվածություն է ձեռք բերվել՝ գյուղացիների պարտքերը վճարելու առթիվ:
«Երեկ իմ տեղակալը եղել է Արտաշատում, առաջիկայում վճարումները կսկսեն»,-ասաց նախարարը:
Նրա խոսքերով՝ ընդհանուր առմամբ գյուղացիներից 39 մլրդ դրամի խաղող է մթերվել, և ներկա պարտքը կազմում է 2.5 մլրդ, գործարանները պայմանավորվածություն են ձեռք բերում գյուղացիների հետ՝ գրաֆիկով վճարելու համար:
