ԱԷՄԳ-ը տվյալներ ունի այն մասին, Իրանը շարունակում է աշխատել միջուկային զենքի ստեղծման ուղղությամբ, սակայն գործակալությունը չի պնդում, որ Թեհրանը մտադիր է նման զենք ստեղծել: Ինչպես հաղորդում է Interfax-ը, այս մասին հայտարարել է կազմակերպության ղեկավար Յուկիո Ամանոն:
«Մենք չենք պնդում, որ Իրանը միջուկային զենք ունի կամ՝ որ Իրանը մտադիր է միջուկային զենք ստեղծել: Սակայն մեզ մոտ առկա տեղեկատվությունը վկայում է այն մասին, որ Իրանում ամեն դեպքում որոշակի աշխատանքներ են տարվում այդ ուղղությամբ»,- ասել է նա:
Ամանոյի խոսքերով՝ այդ աշխատանքները կապված են միջուկային պայթուցիկ սարքի մշակման հետ: Դրա հետ մեկտեղ, ԱԷՄԳ-ի ղեկավարն ընդգծել է, որ կազմակերպությունը չի շտապում եզրակացություններ անել այս հարցի վերաբերյալ:
«Մենք շուտափույթ եզրակացություններ չենք անում, մենք հարցեր ենք տալիս»,- ասել է նա:
Մեկնաբանելով Իսրայելի մոտ միջուկային զենքի հավանական գոյության հարցը՝ Ամանոն նշել է, որ Իսրայելը չի միացել Միջուկային զենքի չտարածման մասին պայմանագրին, և այդ պատճառով ԱԷՄԳ-ը կարող է տեսչական ստուգումներ անցկացնել միայն այն օբյեկտներում, որոնք Իսրայելն ինքնակամ կհամաձայնի դնել կազմակերպության վերահսկողության ներքո:
