Ընդդիմությունը պետք է փորձի նոր լիցք հաղորդել իր գործունեությանը: Այսօր լրագրողների հետ հանդիպման ժամանակ այս մասին ասաց ՀԺԿ նախագահ Ստեփան Դեմիրճյանը՝ խոսելով ներքաղաքական զարգացումների շուրջ:
Նա նշեց, որ իր ղեկավարած կուսակցության գնահատականը հստակ է՝ երկիրը համակարգային, քաղաքական, սոցիալ-տնտեսական, բարոյական ճգնաժամի մեջ է, այլ կերպ ասած՝ երկրում գաղջ մթնոլորտ է, և այս պայմաններում վերանշանակվում է այն կառավարությունը, որի գործունեության հետևանքով աճել է աղքատությունը, արտագաղթը, գործազրկությունը, և հիմնավորումն այն է, որ կառավարությունն ապահովել է յոթ տոկոս տնտեսական աճ: Ըստ նրա՝ եթե այդ աճը նույնիսկ կա, տեսանելի չէ, տեսանելի են բացասական միտումները՝ շարունակում է աճել արտագաղթը:
«Վերջին հինգ տարիներին Հայաստանը լքել է երկու հարյուր հազար մարդ, որևէ առաջխաղացում չկա երկրում: Լրջագույն մարտահրավերների առաջ է կանգնած երկիրը, առաջին հերթին պետք փոխենք բարոյահոգեբանական մթնոլորտը, պետք է առաջին հերթին անցկացնել նորմալ ժողովրդավարական ընտրություններ, որը չի արվում: Վերջին նախագահական ընտրություններին գնահատական տվել ենք, դրանք Հայաստանի նորագույն պատմության լավագույն ընտրությունները չէին, այլ համալրեցին կեղծված ընտրությունների ցանկը: Աղետալի վիճակում է երկիրը, և սա չափազանցություն չէ:
ՀԺԿ-ն չմասնակցեց ավագանու վերջին ընտրություններին, քանի որ մենք գտնում ենք, որ ավելի ճիշտ կլիներ ընդդիմության մասնակցությունը մեկ միասնական ցուցակով։ Քանի որ դա տեղի չունեցավ, մենք չմասնակցեցինք այդ ընտրություններին: Մենք համարում էինք, որ ճիշտ տարբերակը դա էր: Այդ դեպքում ընդդիմությունը հաղթելու էր: Սա չի նշանակում,թե մենք քննադատում ենք այն ուժերին, որոնք մասնակցել են: Ցավոք, ընտրություններով երկրում իրավիճակը չի փոխվում, մենք մշտապես ուզել ենք փոփոխությունների հասնել խաղաղ ճանապարհով՝ ձևավորելով ավանդույթ իշխանափոխության, սակայն ընտրական ինստիտուտները ոչնչացված են, ժողովրդի մեծամասնությունը հավատ չունի»,- նշեց Ստեփան Դեմիրճյանը՝ հավելելով, որ պատրաստվում են քայլեր ձեռնարկել ՀԺԿ ամրապնդման ուղղությամբ, պատրաստ են համագործակցել ընդդիմադիր ուժերի հետ, սակայն ամեն ինչ պետք է կոնկրետ լինի: Նրա կարծիքով՝ ընդդիմությունը պետք է փորձի նոր լիցք հաղորդել իր քաղաքականությանը:
