MK-Turkey-ի փոխանցմամբ՝ Իրաքի արտգործնախարար Իբրահիմ ալ-Ջաֆարին երկրում Թուրքիայի դեսպան Ֆարուք Քայմաքչիի հետ հանդիպման ժամանակ անսպասելի է համարել Թուրքիայի իշխանությունների այն որոշումը, որն առնչվում է իրաքցիների մուտքը երկիր բարդացնելուն։
Թուրքիայի ԱԳՆ-ը նախորդ շաբաթ հայտարարեց Իրաքի հետ վիզային ռեժիմի խստացման մասին՝ իր որոշումը բացատրելով ապօրինի ներգաղթի դեմ պայքարի գործոնով։ Մասնավորապես, իրաքցիներն այլևս չեն կարող սահմանը հատելու համար թուրքական վիզա ստանալ սահմանային անցակետերում։
Իբրահիմ ալ-Ջաֆարին թուրք դեսպանին հայտարարել է, որ Իրաքը կարող է համանման միջոցներ ձեռնարկել Թուրքիայի դեմ։ Նրա խոսքերով՝ Իրաքը Թուրքիայից ակնկալում էր լարվածությունը նվազեցնելու ու Իրաքի հետ մերձենալու փորձ, սակայն իրենք տեսան հակառակը։
Ֆարուքն իր հերթին հայտարարել է, որ իր երկիրն այդ քայլին գնացել է Եվրոպա մեկնել ցանկացող ապօրինի ներգաղթյալների հոսքը կարգավորելու նպատակով։
