Մայիսի 11-ին 18-ամյա ամերիկացի Ռեյմոնդ Ուոլթերին մաթեմատիկայի, ֆիզիկայի և տնտեսագիտության ոլորտում բակալավրի աստիճան են շնորհել, սակայն նա չի ցանկանում բավարարվել այդ ձեռքբերումով և ծրագրում է մաթեմատիկայի և ֆիզիկայի դոկտոր դառնալ:
Կարծես, երիտասարդ ամերիկացին շտապելու բան չունի, սակայն նա տառապում է հազվագյուտ գենետիկական հիվանդությամբ, որով հիվանդանում է 3600 նորածին տղաներից ընդամենը մեկը՝ Դյուշենի մկանային դիստրոֆիայով (ԴՄԴ):
Այս հիվանդությունը շատ արագ է զարգանում, և արդյունքում մարդը դադարում է շարժվելուց: 12-15 տարեկանում հիվանդներն այլևս չեն շարժվում, իսկ 20-30 տարեկանում մահանում են: Այս հիվանդությամբ տառապողների կյանքի միջին տևողությունը 25 տարի է:
Այդ պատճառով էլ հաշմանդամի սայլակին գամված 18-ամյա Ռեյմոնդը փորձում է առավելագույնս օգտագործել իր հնարավորությունները:
Իր համառության շնորհիվ 18-ամյա երիտասարդն արդեն բակալավր է դարձել, ինչպես նաև 30 հազար դոլարի չափով գրանտ է շահել՝ հետազոտությունների համար:
Այժմ Ռեյմոնդի պլաններում մաթեմատիկայի և ֆիզիկայի դոկտորի աստիճանն է: Նա խոստովանել է, որ գիտակցում է՝ իր ժամանակը սուղ է, այդ պատճառով էլ այն զուր չի վատնում: Երիտասարդի գիտական ղեկավարները նրան իսկական հերոս են անվանում և հիանում են նրա ընտանիքով, որը տաղանդավոր տղային օգնելու համար փոխել է իր ամբողջ կյանքը և պատրաստ է ամեն ինչով աջակցել նրան:
