Այսօր հայտնի դերասան Ադրիանո Չելենտանոն իտալական թերթերից մեկում հրապարակել է բաց նամակ, որում կոչ է արել Իտալիայի քաղաքացիներին` գնալ հանրաքվեի և քվերակել Իտալիայի կառավարության վերջին նախաձեռնությունների դեմ:
Չելենտանոն կարծում է, որ երկրի բոլոր քաղաքացիները` ուսանողները, կոմունիստները, ֆաշիստները, պետք է միահամուռ հանդես գան ընդդեմ կառավարության: «Արդեն պետք չէ լինել աջակողմյան կամ ձախակողմյան, որպեսզի հասկանանք, որ այնպիսի մարդն, ինչպիսին Բեռլուսկոնին է, չի կարող կառավարել ոչ միայն Իտալիան, այլ նաև ցանկացած այլ պետություն: Լավագույն դեպքում նա և իր խաբեբա ձայնակցողները կարող են հարմար լինել ինչ որ ցեղի համար, որտեղ բոլորը, հավաքված լինելով ցեղապետի շուրջ, հերթով սնվում են նրանց ստից», ասել է Չելենտանոն:
Նա նաև անդրադարձել է Բեռլուսկոնիի սիրային կապերին անչափահաս մարոկուհու հետ` անթաքույց հեգնանքով գրելով, թե Բեռլուսկոնին բոլորին փորձում էր ապացուցել, որ ինքը հավատացած է եղել, թե դա Հոսնի Մուբարաքի թոռն է:
«Նա ցանկանում է Սահմանադրություն փոխել անեկդոտների միջոցով, որոնք արդեն ոչ մեկին ծիծաղելի չեն թվում: Նա հակամարտության մեջ է դատավորների հետ, որոնք ուզում են նրան դատեն: Մեղադրանքները նրա հասցեին արդեն դժվար է հաշվել: Միգուցե նա իրոք անմեղ է, սակայն մենք դա երբեք չենք իմանա, քանի որ նա չի ցանկանում ներկայանալ դատարան և իրեն հաշիվ չի տալիս, որ իր իսկ ընտրողներն սկսում են հարցնել, թե արդոք արդար է, որ իրենց ղեկավարում է խաբեբան», գրում է հայտնի երգիչը:
Ադրիանո Չելենտանոն կոչ է արել բոլորին միահամուռ գնալ հանրաքվեի և ոչ ասել կառավարության կողմից ներկայացված առաջարկներին: Հունիսի 12-ի հանրաքվեի ժամանակ ի թիվս այլ հարցերի նաև առաջարկվում է փոխել այն օրենքը, որը թույլ կտա Բեռլուսկոնիին, հղում կատարելով պետական գործերով զբաղված լինելու հանգամանքին, չներկայանալ դատարան, ինչն, ըստ նոր օրենքի, կհամարվի «հարգելի բացակայություն»:
