Եվրոպայի երկրների շուրջ կեսն ունի բանտերի գերբնակեցվածության խնդիր: Ինչպես հաղորդում է ITAR-TASS-ը, այս մասին ասվում է Եվրոպայի Խորհրդի զեկույցում:
Հետազոտության մեջ նշվում է, որ եվրոպական 47 երկրներից շուրջ 20-ում բանտարկյալներն ավելի շատ են, քան բանտերում եղած տեղերը: Բանտերի գերբնակեցվածության խնդիրը մասնավորապես առկա է Սերբիայում (157.6 բանտարկյալ՝ 100 տեղի համար), Հունաստանում (151.7), Իտալիայում (147): Ցուցիչն ավելի ցածր է Բելգիայում (127.2), Հունգարիայում (138.2), Ֆրանսիայում(113.4):
Զեկույցի հեղինակները, սակայն, ուշադրություն են դարձնում, որ յուրաքանչյուր երկիր անկախ մյուսից սահմանում է բանտերի տարողունակության և դատապարտյալների տեղակայման չափանիշներ:
Խոսքը 2011թ. հավաքված տվյալների մասին է: Վիճակագրության համաձայն՝ այդ ժամանակ ԵԽ անդամ պետություններում ընդհանուր առմամբ եղել է 1.86 միլիոն բանտարկյալ կամ 154 բանտարկյալ՝ յուրաքանչյուր 100 հազար մարդու համար: Ամենամեծ ցուցանիշներով երկրներն են՝ Ուկրաինան (միջինը 347.7 բանտարկյալ՝ 100 հազար բնակչի համար), Ադրբեջանը (417), Վրաստանը (541.2):
Զեկույցում նաև նշվում է, որ դատապարտյալները միջինը 33 տարեկան են: Շուրջ ¼-ը կրել է մեկ տարուց քիչ պատիժ, իսկ 14%-ը՝ ավելի քան 10 տարի:
