Ռուսաստանի Կոնյակ արտադրողների միությունը՝ «Սոյուզկոնյակը», առաջարկել է արգելել ներմուծվող կոնյակի պետգնումները: Այս առաջարկի նպատակը, ըստ էության, հայրենական արտադրանքը խրախուսելն է։ Այս առաջարկից հետո, սակայն, մտահոգություններ են հնչում, որ սա կարող է լուրջ հարված լինել հայաստանյան արտահանող ընկերությունների համար, քանի որ Հայաստանից արտահանման հիմնական երկիրը Ռուսաստանի դաշնությունն է։
Հայաստանի գինեգործների միության նախագահ Ավագ Հարությունյանը, սակայն, վստահ է, որ հայաստանյան արտահանումները ռուսական պետգնումներով չեն անցնում, և մենք, մեր արտահանողները մտահոգվելու առիթ չունենք։
«Արտահանումները մասնավոր բնույթ են կրում, իսկ պետգնումները ուրիշ ներմուծումներ են իրականացնում, որոնք կապ չունեն Հայաստանի հետ։ Ինչ վերաբերում է «Արարատ» կոնյակին, ապա դա այնքան փոքր ծավալ է կազմում, այնքան չնչին է, որ չափազանցված է ասել, թե լուրջ վնաս է հասցնելու մեր արտահանմանը»,- «Առաջին լրատվական»-ի հետ զրույցում ասաց Հարությունյանը։
Ինչ վերաբերում է մեր ալկոհոլային խմիչքների արտահանմանն առհասարակ, որը նախորդ ամիսներին էականորեն նվազել էր, Հարությունյանի խոսքով՝ ակնկալիքներ կան, որ այս ամսին՝ նոյեմբերին, արտահանման էական աճ կարձանագրվի։ «Նոյեմբերին չափազանց ակտիվ է արտահանումը, և մեծ սպասելիքներ կան, որ վիճակը կկայունանա»,- ասաց մեր զրուցակիցը։
