Լեռնային Ղարաբաղի վերաբերյալ զեկույցներ հրապարակելուց առաջ Եվրախորհրդի խորհրդարանական վեհաժողովին (ԵԽԽՎ) հարկ է խորհրդակցել ԵԱՀԿ-ի հետ: Թվիթերում այսպիսիգրառում է կատարել ԵԱՀԿ-ի Մինսկի խմբի ամերիկացի համանախագահ Ջեյմս Ուորլիքը:
«Ազատության» փոխանցմամբ՝ ամերիկացի դիվանագետը նման ձևով արձագանքել է, մասնավորապես, Լեռնային Ղարաբաղին առնչվող վիճահարույց բանաձևի նախագծին ԵԽԽՎ-ի քաղաքական հանձնաժողովի հավանություն տալուն:
Բրիտանացի պատգամավոր Ռոբերտ Ուոլթերի հեղինակած զեկույցում կոչ է արվում «դուրս բերել հայկական զինուժը Լեռնային Ղարաբաղից և Ադրբեջանի մյուս գրավյալ տարածքներից, և այդ տարածքներում հաստատել Ադրբեջանի լիակատար ինքնիշխանությունը»: Զեկույցը Հայաստանում լուրջ քննադատության է արժանացել իշխանությունների կողմից, իսկ ընդդիմությունը դրա շրջանառումը հայ դիվանագիտության պարտություն է որակել։
Հայաստանում Մեծ Բրիտանիայի դեսպան տիկին Ջուդիթ Ֆարնվորթն այսօր «Ազատության» հետ զրույցում ասել է, որ այդ զեկույցի վերաբերյալ ինքը զրույց է ունեցել Բրիտանիայի արտաքին գործերի նախարարության հետ։
«Միացյալ թագավորության կառավարության դիրքորոշումն այն է, որ սա խորհրդարանական վեհաժողովին վերաբերող խնդիր է։ Կառավարությունը չի կարող թելադրել կամ վերահսկել, թե ինչ են անում պառլամենտի անդամները, քանի որ նրանք անկախ են։ Ես այս մասին քննարկումներ ունեցել եմ արտաքին գործերի նախարարության ներկայացուցիչների հետ և, օգտվելով հնարավորությունից, ասել եմ, որ մենք համոզված ենք՝ ԵԱՀԿ-ն լավագույն հարթակն է քննարկումները առաջ տանելու և հակամարտությունը կարգավորելու համար։
Թեև, մենք ընդունում ենք, որ ցանկացած կառույց պետք է հնարավորություն ունենա քննարկել այսպիսի հարցերը, բայց մենք մեծապես աջակցում ենք Մինսկի խմբին և ցանկանում ենք, որ գործընթացը շարունակվի ու խնդիրը հանգուցալուծվի»,- նշել է Մեծ Բրիտանիայի դեսպանը։
