Հոկտեմբերի 27-ի գործով Դեմիրճյանների ընտանիքի շահերի պաշտպան, փաստաբան Աշոտ Սարգսյանը «Առաջին լրատվական»-ի հետ զրույցում անդրադառնալով այդ ոճրագործությանը՝ ասաց. «Նախաքննության մարմինը բավարարել է իմ բազմաթիվ միջնորդությունները, բայց դրանից հետո գործը կարճվել է: Այդպես չի լինում: Փորձ արվեց գործի անջատման մասը կարճելով՝ եզրափակել և էջը շրջել»:
Փաստաբանի կարծիքով՝ այն մարդիկ, ովքեր կոչված էին բացահայտելու այդ գործը, իրենց նպատակին հասել են. «Դա դարձրել են ուչաստկովի գործ, մի քանի հոգու դատապարտել են և դրանով ավարտել: Արդյունքում կազմակերպիչը մնաց Նաիրի Հունանյանը»:
Աշոտ Սարգսյանը տեսնում է այն վտանգը, որ հետագա սերունդները, ինֆորմացիայի պակասի արդյունքում, կարող են այս գործի վերաբերյալ այնպիսի պատկերացում կազմել, թե սա ընդամենը 5 հոգու ձեռքի գործն էր:
Ինչպես նշեց Աշոտ Սարգսյանը, այս գործում կան բազմաթիվ հարցականներ, որոնցից մեկը Տիգրան Նազարյանի՝ ԱՄՆ 4-5 օրով գործուղումն էր, որը, սակայն, երկարաձգվեց. «Իսկ այդ հարցերի պատասխանը պետք է տրվեր նրա կենդանության օրոք: Ի դեպ, նրանցից ոչ ոք չի դատապարտվել սպանության համար, այլ դատապարտվել են 301 հոդվածով՝ պետական գործիչներին սպանելու համար: Եվ տուժողը առաջին հերթին պետությունն է»:
Աշոտ Սարգսյանը համոզված է, որ իշխանափոխության դեպքում գործը կարող է բացահայտվել, թեև գործով անցնող բավականաչափ մարդիկ այլևս ողջ չեն:
