Ադրբեջանական 1news.az կայքի փոխանցմամբ, Ադրբեջանի արտգործնախարար Էլմար Մամեդյարովը ռուսական РИА Новости լրատվական գործակալությանը տված հարցազրույցի ժամանակ անդրադարձ է կատարել հայ-թուրքական հարաբերությունների կարգավորմանը.
«Հայ-թուրքական մերձեցումը, իհարկե, Թուրքիայի գործն է: Մենք չենք կարող միջամտել նրա ներքին խնդիրներին: Սակայն եթե այդ գործընթացն ընթանա նույն ձևաչափով, ինչպես որ նախորդ անգամ, այսինքն՝ եթե այս անգամ էլ հաշվի չառնվեն Ադրբեջանի շահերը, ապա մենք ստիպված կլինենք արձագանքել: Թուրքական ղեկավարությունը դա արդեն գիտակցել է:
Հայ-թուրքական սահմանի փակման գործում ծանրակշիռ դեր է խաղացել Քարվաճառի (Քելբաջար) «օկուպացիան», որը Լեռնային Ղարաբաղի սահմաններից դուրս ընկած առաջին «օկուպացված» շրջանն էր:
Քարվաճառի «օկուպացմանը» թուրքական իշխանությունները գիտակից արձագանք տվեցին` հրաժարվելով հարաբերություններ ունենալ «ագրեսորի» հետ:
Իսկ ինչո՞ւ այժմ պետք է տեղի ունենա հայ-թուրքական մերձեցման գործընթաց, ի՞նչ է փոխվել մինչ այժմ, մի՞թե Քարվաճառն «ազատագրվել» է: Ո´չ: Դրա համար էլ մենք Թուրքիային` որպես ազդեցիկ ու կայունացնող երկրի, կոչ ենք անում հայ-թուրքական գործընթացը սկսել «օկուպացված» տարածքներից հայկական զորքերի դուրս բերումից: Դա «լուրջ դրական» տեղաշարժեր կառաջացնի»:
Հիշեցնենք, որ մարտի կեսերին CNN Turk-ին տված հարցազրույցի ժամանակ Ադրբեջանի փոխարտգործնախարար Արազ Ազիմովը նշել էր.
«Սկսելով հայ-թուրքական հարաբերությունների կարգավորման գործընթացը` Թուրքիան մեծ սխալ է գործել, քանի որ նախապես դա չի համաձայնեցրել Ադրբեջանի հետ: Եթե Ադրբեջանը նախապես տեղեկացված լիներ այդ գործընթացի սկսման մասին, ապա այն կարող էր ընթանալ այլ ուղղությամբ»:
