Սերժ Սարգսյանի երդմնակալության համար Հայաստան ժամանած Երևանի նախկին քաղաքապետ Կարեն Կարապետյանին երեկ «Հրապարակը» հարցրեց՝ եկել եք ապագա վարչապետի պաշտո՞նն ստանձնեք: «Ոոոոոոոոչ, ոչ»,- ժպտալով ասաց նա և բացատրեց, որ նման ցանկություն չունի: Ինչո՞ւ, Ձեր զբաղեցրած պաշտոնն ավելի՞ շահավետ է, նկատեցին՝ հիշեցնելով, որ քաղաքապետի պաշտոնից Կարապետյանը հրաժարական տվեց հենց այդ պատճառաբանությամբ: Ի պատասխան՝ Կարապետյանը միայն բարձր-բարձր ծիծաղեց: Մի՞թե վարչապետի պաշտոնից մարդ կհրաժարվի, կատակեցինք մենք: «Պատկերացրեք, որ հնարավոր է»,- ասեց Կարապետյանը:
Պատասխանելով Րաֆֆի Հովհաննիսյանի երդմնակալության արարողության հարցին և հատկապես դիտարկմանը, թե որն է իր գնահատականը երկրում երկու ինաուգուրացիայի արարողության փաստին, Կարապետյանը հակիրճ ասաց. «Շատ ցավում եմ դրա համար, կարծում եմ՝ դա աննորմալ երևույթ է»:
Ի դեպ, վերջին հարցն ուղղեցին նաև Աժ նախկին խոսնակ Տիգրան Թորոսյանին: Նա հրաժարվեց պատասխանել՝ պատճառաբանելով, թե ինքը հոդված է գրել այդ մասին: Իսկ ապագա կառավարությունում հայտնվելու հավանականության հարցին ի պատասխան ասաց, որ իր աշխատանքն իրեն շատ է դուր գալիս, և որևէ ակնկալիք ինքը չունի: Հիշեցնենք, որ Թորոսյանն այժմ դասախոսում է Բրյուսովի անվան համալսարանում:
