Երևանի ավագանու մայիսի 5-ի ընտրություններին մասնակցող 7 քաղաքական ուժերից 2012թ.-ի համար գույքի և ֆինանսական միջոցների հայտարարագրեր Կենտրոնական ընտրական հանձնաժողով ներկայացրել են 6-ը:
Հայտարարագիր չի ներկայացրել միայն «Առաքելություն» կուսակցությունը, որն ընդամենը մեկ ամիս առաջ է գրանցվել պետական ռեգիստրում:
Հայտարարագրեր ներկայացրածներից ամենահարուստը ՀՀԿ-ն է: Հանրապետականը հայտարարագրել է 58 միավոր անշարժ գույք՝ Երևանում և մարզերում, որից 42-ը՝ շենքեր, 16-ը՝ հողեր: Շենքերից 33-ը կուսակցությանը պատկանում են սեփականության իրավունքով, իսկ 9-ը վարձակալված են:
Հողամասերից 15-ը՝ սեփականության իրավունքով, 1-ը՝ վարձակալությամբ:
ՀՀԿ-ն ունի նաև 8 միավոր շարժական գույք՝ մարդատար ավտոմեքենաներ, 39 մլն 843 հազար 822 դրամի չափով դրամական միջոցներ:
Հանրապետականի եկամուտները 2012թ.-ին գոյացել են 364 մլն 539 հազար 760 դրամի չափով անդամավճարներից և կուսակցության անդամների նվիրատվություններից, 29 մլն 530 հազար 400 դրամի չափով բյուջետային ֆինանսավորումից, 13 մլն 4 հազար 480 դրամի չափով վարձակալության վճարներից և 8 մլն 35 հազար 77 դրամի չափով այլ եկամուտներից:
Ի դեպ՝ ՀՀԿ-ն վերոհիշյալ վարձակալության վճարներից եկամուտները ստացել է 7 հիմնարկներից, այդ թվում, մասնավորապես՝ Կապանի հանրախանութից, Վայոց Ձորի մարզպետարանից, Վայքի փաստաբանների պալատից, Վայքի Զբաղվածության պետական ծառայությունից, Եղեգնաձորի հարկային տեսչությունից:
«Բարգավաճ Հայաստան» կուսակցությունը հայտարարագրել է 8 մլն 933 հազար 9 դրամի չափով դրամական միջոցներ և Երևանում ու մարզերում գտնվող 53 միավոր անշարժ գույք, որից միայն մեկը վերցված է վարձակալությամբ, մնացածը՝ օգտագործվում են անհատույց: ԲՀԿ-ն շարժական գույք չունի:
ԲՀԿ-ի եկամուտները գոյացել են ի շնորհիվ 17 մլն 511 հազար դրամ պետական բյուջեից ֆինանսավորման, 14 մլն 397 հազար դրամ անդամավճարների և 68 հազար 772 դրամ Արդշինինվեստբանկում տոկոսների կուտակման:
ՀՅԴ-ն հայտարարագրել է 35 միավոր անշարժ գույք՝ սեփականության իրավունքով, 2 մլն 91 հազար 490 դրամի դրամական միջոցներ: Դաշնակցությունը շարժական գույք և եկամուտներ չի հայտարարագրել:
«Հայ ազգային կոնգրես» կուսակցությունը հայտարարագրել է մեկ միավոր անշարժ գույք՝ սեփականության իրավունքով, 2 մլն 162 հազար 800 դրամի դրամական միջոցներ: Տարեկան եկամուտները կազմել են 5 մլն 259 հազար 700 դրամ, ինչը գոյացել է անդամավճարներից, նվիրատվություններից և պետբյուջեից ֆինանսավորումից:
«Բարև Երևան» կուսակցությունների դաշինքի մաս կազմող «Ժառանգություն» կուսակցությունը հայտարարագրել է միայն եկամուտներ՝ 25 մլն 666 հազար դրամի նվիրատվություններ և 4 մլն 387 հազար դրամի պետական բյուջեից ֆինանսավորում:
Դաշինքի մաս կազմող «Ժողովրդավարական հայրենիք» կուսակցությունը ևս հայտարարագրել է միայն եկամուտներ՝ 290 հազար դրամ անդամավճար և 250 հազար նվիրատվություն:
«Բարև Երևան»-ի մաս կազմող մյուս երկու կուսակցությունները՝ «Ժողովրդավարական ուղի»-ն և «Շրջադարձ»-ը, ներկայացրել են 0-ական հայտարարագրեր:
Ի տարբերություն մյուս կուսակցությունների, «Օրինաց երկիր»-ը հայտարարագիրը ներկայացրել է ոչ թե 2012թ.-ի համար, այլ 2012թ.-ի ապրիլի 1-ից մինչև 2013թ.-ի ապրիլի 1-ն ընկած ժամանակահատվածի:
ՕԵԿ-ը հայտարարագրել է մեկ միավոր անշարժ գույք՝ սեփականության իրավունքով, 2 միավոր շարժական գույք՝ մարդատար ավտոմեքենաներ, և 1 մլն 36 հազար դրամի դրամական միջոցներ: Եկամուտները գոյացել են 4 մլն 633 հազար 400 դրամ պետական ֆինանսավորումից և 8 մլն 650 հազար դրամի չափով կուսակցության անդամների նվիրատվությունից:
