Ծխելը շուտով կարող է դառնալ Չինաստանի երիտասարդների երկու երրորդի մահվան պատճառը: Այսպիսի եզրակացության են հանգել Օքսֆորդի համալսարանի, Չինաստանի բժշկական գիտությունների ակադեմիայի և Առողջապահության վերահսկման չինական կենտրոնի գիտնականները՝ հայտնում է BBC-ն:
Հետազոտությունները ցույց են տվել, որ Չինաստանում երիտասարդների երկու երրորդը սկսում է ծխել մինչև 20 տարեկան դառնալը:
Գիտնականների կանխագուշակումները անհանգստացնող են. եթե 2010 թվականին ծխելու պատճառով մարդկանց մահացության դեպքերը հասել են մեկ միլիոնի, ապա 2030 թվականին այդ ցուցանիշը կգերազանցի 2 միլիոնը, եթե չինացիները չփոխեն իրենց ապրելակերպը:
«Մահվան ալիքը դադարեցնելու համար անհրաժեշտ է թողնել ծխելը: Իսկ եթե դուք դեռ երիտասարդ եք, մի սկսեք»,- ասում է Օքսֆորդի համալսարանի գիտնական Ռիչարդ Պետոն:
Հետազոտությունների համաձայն՝ Չինաստանում վերջին ժամանակներս ծխող տղամարդկանց թիվը զգալիորեն աճել է, համամասնորեն աճել է նաև ծխելուց առաջացած հիվանդություններից մահացության դեպքերի թիվը: Միևնույն ժամանակ, երկրում երիտասարդ կանայք ավելի քիչ են հակված ծխելու, քան 30-ականների սերունդը:
Պեկինում հունիսի 1-ից ուժի մեջ է մտել հասարակական վայրերում չծխելու օրենքը, օրինազանցները կտուգանվեն 32 դոլարով:
