«Առաջին լրատվական»-ի զրուցակիցն է ՀՀԳԱ Արևելագիտության ինստիտուտի ավագ գիտաշխատող Վահրամ Տեր-Մաթևոսյանը:
Անդրադառնալով Ռուս-թուրքական լարված հարաբերություններին՝ կապված Սիրիայում սկսված գործընթացների հետ, Վահրամ Տեր-Մաթևոսյանը նշեց. «Թուրք-ռուսական հարաբերությունները սկսել են տարաբևեռվել դեռ 2011թ-ից, երբ պարզվեց, որ Ռուսաստանի և Թուրքիայի դիրքորոշումները կտրականապես տարբեր են՝ կապված սիրիական ճգնաժամի հետ: Թուրք-ռուսական հարաբերությունների հետնաբեմում դանդաղ, 4 տարի շարունակ այս ճգնաժամը առկայծում էր: Կարևոր դեր խաղաց Էրդողանի կառավարության կողմից դրված կտրական որոշումը, որ Ասադը պետք է հեռանա: Ռուս-թուրքական հարաբերությունների վրա ազդեցություն են թողնում նաև էներգետիկ խնդիրների հետ կապված տարընթերցումները՝ «Թուրքական հոսք»-ի վերաբերյալ: Թուրքիան կարծես հավակնում էր դառնալ տրանզիտ երկիր ռուսական էներգակիրների համար»:
Վերջին օրերին ռուս-թուրքական հարաբերությունների հակասություններին անդրադառնալով, Վահրամ Տեր-Մաթևոսյանը նշեց, որ այս հարցում կարևոր դեր է խաղում նաև հակառուսական ինֆորմացիոն պատերազմը, որում Թուրքիային կարևոր դեր է վերապահված. «Այդ ինֆորմացիոն պատերազմում Ռուսաստանի հանգստությունը դրական է ընկալվում միջազգային հանրության կողմից: Թափանցիկությամբ, հեռուստատեսությամբ բացահայտ ցուցադրելով իր գործողությունները, Ռուսաստանը փորձում է հակազդել հակաքարոզչությանը»:
Անդրադառնալով այն հարցին, թե ինչ հետևանքներ կարող է ունենալ տարածաշրջանի ապագայի հարցում ռուս-թուրքական դիմակայությունը, Վ. Տեր-Մաթևոսյանը նշեց. «Թուրքիայի դերը, իր աշխարհագրական դիրքից ելնելով, աճել է Եվրոպայի և Ամերիկայի աչքում. հաշվի առնելով փախստականների ճգնաժամը՝ Թուրքիային հնարավորություն է տրվելու գումարով և այլ հնարավորություններով կանխել այդ ճգնաժամը, որը սպառնում է Եվրոպային:
Ռազմավարական նախընտրությունները հավերժական չեն, և պետք է վերանայել: Սիրիական ճգնաժամի հետ կապված խնդիրը կարող է ուղղակի կամ անուղղակի տեղափոխվել մեր տարածաշրջան՝ կապված Իսլամական պետության՝ Ռուսաստանում և Հյուսիսային Կովկասում ընդլայնման հետ:
Ռուսաստանը հայտ է ներկայացրել, որպեսզի ակտիվ դերակատարություն ստանձնի համաշխարհային գործընթացներում: Եվ իր բոլոր գործողությունները տարածաշրջանային, ենթատարածաշրջանային և անդրտարածաշրջանային առումներով պետք է համապատասխանի այդ դերին, որ նա հավակնում է: Հետևաբար պետք է բացառել հակասությունները, որ Ռուսաստանի քաղաքական վերնախավի կողմից հնարավոր է տեղի ունենան: Ցանկալի է, որ գոնե այս տարածաշրջանում, որ լարվածություններով լի է, խնդիրները մինիմումի հասցվեն: Դժվար է ասել, թե Ռուսաստանի ստանձնած դերին ինչպիսի ենթադեր է տրվել Հարավային Կովկասին»:
Մանրամասները՝ տեսանյութում:
