Ինչպես տեղեկացրել էինք, սեպտեմբերի 25-ին զորամասերից մեկի պահպանության շրջանի ուղղությամբ հրանոթից արձակված արկերի պայթունների հետևանքով ստացած մարմնական վնասվածքներից զոհվել են ժամկետային զինծառայողներ՝ Նորայր Միքայելի Խաչատրյանը, Ռոբերտ Սուրենի Մկրտչյանը, Կարեն Գևորգի Շահինյանը, Հարութ Մաքսիմի Հակոբյանը, իսկ տարբեր աստիճանի մարմնական վնասվածքներ են ստացել և զինհոսպիտալ տեղափոխվել ժամկետային զինծառայողներ Արկադի Արմենի Մուրադյանը, Հարություն Նորիկի Թովմասյանը, Կարեն Սասունի Վարդանյանը, Վանիկ Ավետիքի Մարտիրոսյան, Թաթուլ Աշոտի Պողոսյանը, Սերգեյ Հարությունի Էլոյանը, Խաչատուր Հայրիկի Պապիկյանը, Յաշա Արկադիի Բաղդասարովը, Արման Արմենակի Ստեփանյանը, Նարեկ Սարմենի Թառումյանը, Կարեն Անատոլիի Երեմյանը, Սաֆար Արսենի Սաֆարյանը, Վուրգ Աղասու Գալստյանը, Ռազմիկ Նորիկի Խաչատրյանը, Սեդրակ Հովսեփի Ղարիբյանը, Հայկ Հովհաննեսի Հովհաննիսյանը:
Մուրացանի զինվորական հոսպիտալի Վնասվածքաբանական բաժանմունքի պետ Լևոն Ժամագործյանը մեզ հետ զրույցում նշեց, որ այս պահին հոսպիտալում ունեն վեց վիրավոր, վեցն էլ գտնվում են միջին և բավարար վիճակում:
«Վեցից երկուսն են միջին ծանրության, բավականին լուրջ վիրավորումներ են, հիմա արդեն վերակենդանացման բաժանմունքից տեղափոխվել են բաժանմունք, և պատրաստվում են հետագա վիրահատությանը: Նրանցից մեկին սպասվում է աջ բազուկոսկրի վիրահատություն, մյուսին՝ ազդրի վիրահատություն»,- ասաց նա:
Արթիկցի զինծառայող Արկադի Մուրադյանը երկու ամիս առաջ է զորակոչվել բանակ: «Առաջին լրատվական»-ին պատմեց բացառիկ մանրամասներ հրանոթից արձակած պայթյուններից: «Կրակում էինք, չորսի կողմերը հաց դրեցինք ուտենք, հինգին վեր կացանք, որ նորից շարունակենք մեր կրակայինը, և պահի տակ գցեցին, չէինք սպասում, հենց առաջին արկը ինձ կպավ, և սկսեցին 20-30 և ավելի գցել»,- պատմեց նա՝ անկեղծանալով, որ այս ամիսներին նման ակտիվություն սահմանին չի եղել, որևէ մեկի մտքով չէր անցնում:
Նրա մայրը՝ Հայկանուշ Վարդանյանը նշեց, որ որդին սրտի խնդիներ ուներ, մեկ տարի ուշ տարան բանակ: Այս անգամ էլ մոր սիրտը կանխազգացել է:
Ավելին՝ տեսանյութում:
