ՌԱՀՀԿ փորձագետ Էդգար Վարդանյանի գնահատմամբ, Վրաստանի խորհրդարանի որոշումը` արգելել իր երկրի տարածքով ռուսական ռազմամթերքի փոխադրումը, ուղղված է ոչ միայն Ռուսաստանի, այլև Հայաստանի դեմ:
«Չեմ կարծում, թե Վրաստանը ուզում է մեզ ինչ-որ բան ցույց տալ, բայց հնարավոր է, որ Վրաստանը, իր պրոարևմտյան դիրքորոշմամբ և կոնֆլիկտ ունենալով Ռուսաստանի հետ, կարող է հակադրվել նաև հայաստանյան շահերին, որովհետև Հայաստանը ակնհայտ պրոռուսական դիրքորոշում ունի»,- մեզ հետ զրույցում պարզաբանեց Էդգար Վարդանյանը:
Փորձագետը Վրաստանի խորհրդարանի որոշումը դիտարկում է նաև որպես Արևմուտքի ազդանշան Հայաստանին` ցույց տալու, որ հայաստանյան իշխանությունների ռուսամետ քաղաքականությունը Հայաստանի համար չի երաշխավորելու ապահով կյանք: «Հայաստանը ահա տեսնում է, որ ուզի թե չուզի, պետք է հաշվի նստի Արևմուտքի շահերի հետ և համագործակցի, եթե չի ուզում ընդհանրապես դուրս մնալ բոլոր գործընթացներից»,- ասաց փորձագետը:
Էդգար Վարդանյանը այս որոշման մեջ խոչընդոտ է տեսնում նաև Հայաստանի անվտանգության ապահովման համար: «Հասարակությունը և քաղաքական ուժերը պետք է բարձրացնեն այն հարցը, թե ինչպես է Ռուսաստանը երաշխավորելու մեր անվտանգությունը, երբ Վրաստանը արգելում է իր տարածքով զինամթերք տեղափոխել: Նախ այդ հարցը պետք է բարձրացնել մեր իշխանության առաջ, ապա` Ռուսաստանի»:
