Փետրվարի 18-ից հետո ծավալված հետընտրական գործընթացների շարքում ամենակարևորներից մեկը, թերևս, երեկ տեղի ունեցած իրադարձությունն էր: Ըստ «168 ժամի»՝ խոսքը Ոստիկանապետ Վլադիմիր Գասպարյանի՝ Րաֆֆի Հովհաննիսյանին այցի մասին է:
Պաշտոնապես, իհարկե, դա ներկայացվեց՝ որպես քաղաքավարական այց, որպես ոստիկանապետի՝ մարդասիրության դրսևորում: Հասկանալի է, սակայն, որ Վլադիմիր Գասպարյանի այցելությունն առաջին հերթին ու բացառապես քաղաքական էր: Խնդիրը Վլադիմիր Գասպարյանի անձը չէ, ոչ էլ այն, որ Րաֆֆի Հովհաննիսյանը նրան զանգահարելու ու անպատասխան չմնալու փորձ ունի: Խնդիրը Հայաստանի իշխանության կառուցվածքում Վլադիմիր Գասպարյանի ունեցած ֆորմալ և ոչ ֆորմալ դերակատարությունն է, որն ընթացիկ փուլում, ամենայն հավանականությամբ, ավելի բարձրացել է: Նախ՝ պաշտոնապես՝ որպես ոստիկանապետ, Վլադիմիր Գասպարյանը զբաղված էր ընտրական գործընթացի համակարգմամբ: Բացի այդ, Վլադիմիր Գասպարյանը համարվում է նախագահ Սերժ Սարգսյանի մերձավոր շրջապատի ներկայացուցիչներից մեկը, ով, ըստ իշխանական կուլիսներում տարածված համոզմունքի, մասնակցում է նաև կարևորագույն որոշումների ընդունմանը: Այսինքն՝ մեծ հավանականությամբ, Սերժ Սարգսյանը Վլադիմիր Գասպարյանի միջոցով Րաֆֆի Հովհաննիսյանին ինչ-որ մեսիջ է ուղարկել: Իրավիճակի նրբությունն այն է, որ այդ մեսիջը կարող է լինել ինչպես՝ առաջարկի, այնպես էլ՝ առաջարկ-սպառնալիքի տեսքով: Ու նաև այդ առումով Վլադիմիր Գասպարյանի անձի ընտրությունը պատահական չէ: Ավելի պարզ ասած, բացառված չէ՝ ոստիկանապետը Րաֆֆի Հովհաննիսյանին փոխանցել է, որ նախագահն այս-այս առաջարկներն է ներկայացնում, որոնց ընդունումը «կառուցողական» շարունակություն կունենա, մերժումը՝ ուժային: Պետք չէ բացառել նաև, որ Վլադիմիր Գասպարյանը Րաֆֆի Հովհաննիսյանի հետ կարող է քննարկած լինել Սերժ Սարգսյանի՝ Ազատության հրապարակ հնարավոր այցի պայմանները:
Սրանք, իհարկե, ընդամենը ենթադրություններ են, որոնք, հրապարակայնության կարգախոսների ներքո հանդես եկող Րաֆֆի Հովհաննիսյանի կիսակոնսպիրատիվ գործելաոճի պայմաններում, կարող են մոտ լինել իրականությանը:
Բոլոր դեպքերում՝ Վլադիմիր Գասպարյանի այցելության արդյունքների մասին որոշակի պատկերացում հնարավոր կլինի կազմել արդեն իսկ առաջիկա օրերին: Մարտի 15-ի հանրահավաքում Րաֆֆի Հովհաննիսյանի հռետորաբանությունը, ինչպես նաև Երևանի ավագանու ընտրություններում «Ժառանգության» մասնակցության ձևաչափի մասին որոշումը կտան այն հարցի պատասխանը, թե ինչ է իրականում ասել Վլադիմիր Գասպարյանը Րաֆֆի Հովհաննիսյանին:
