Մարտի 12-ի երեկոյան, երբ Հռոմի նոր պապի ընտրության կոնկլավում հավանաբար կանցկացվի առաջին քվեարկությունը, կարելի է Վատիկանի Սիքստինյան կապելլայի տանիքին դրված հանրահայտ խողովակից սև ծուխ սպասել։ Երկուշաբթի այս մասին հայտարարել է սուրբ գահի մամլո ծառայության ղեկավար Ֆեդերիկո Լոմբարդին,- փոխանցում է RIA Novosti-ն:
Ըստ հին ավանդույթի՝ հռոմեա-կաթոլիկ եկեղեցու նոր առաջնորդի ընտրության մասին հավատացյալներին պետք է ավետի սպիտակ ծուխը: Այդպիսով, Լոմբարդին պարզ հասկացրել է, որ կոնկլավի սկսվելու օրը պապի ընտրվելուն սպասել պետք չէ:
Նրա խոսքերով՝ Սիքստինյան կապելլայի խողովակից առաջին անգամ ծուխ պետք է բարձրանա երեքշաբթի օրը՝ մոտավորապես 20.00-ին: Նա նաև նշել է, որ կոնկլավի բացման հետ կապված հանդիսավոր արարողությունը Վատիկանում կսկսվի 16.30-ին, երբ ընտրող կարդինալների թափորը դանդաղ կուղղվի դեպքի Սիքստինյան կապելլա:
Հռոմի պապ Բենեդիկտոս XVI-ը փետրվարի 28-ին կամավոր լքել է Սուրբ գահը:
Անցյալ ուրբաթ օրը Կարդինալների կոլեգիայի անդամները ձայների ճնշող մեծամասնությամբ որոշել են, որ պապի ընտրության կոնկլավը, որին կմասնակցի 115 ընտրող կարդինալ, կսկսվի մարտի 12-ին:
